"საქართველოს ფოსტამ" "თურქეთის ავიახაზებთან" მნიშვნელოვანი შეთანხმება გააფორმა - ირაკლი კობახიძე

„საქართველოს ფოსტამ“ ავიაკომპანიებთან გაფორმებული შეთანხმებებისა და მიმდინარე მოლაპარაკებების შედეგად შემოსავლების ზრდა დაგეგმა. როგორც პრემიერ-მინისტრმა ირაკლი კობახიძემ მთავრობის სხდომაზე განაცხადა, საერთაშორისო კომპანიებთან გაფორმებული ხელშეკრულებების შედეგად ფოსტის შემოსავლები 4.4 მლნ ლარით გაიზრდება.

პრემიერის ინფორმაციით, მათ შორის, შეთანხმება გაფორმდა „თურქეთის ავიახაზებთან“, ხოლო კიდევ ხუთ ავიაკომპანიასთან მოლაპარაკებები მიმდინარეობს. პრემიერის განცხადებით, აღნიშნული შეთანხმებები და მოლაპარაკებები „საქართველოს ფოსტის“ შემოსავლების ზრდას უზრუნველყოფს.

„ძალიან მნიშვნელოვანი ხელშეკრულებები გაფორმდა საერთაშორისო კომპანიებთან. მათ შორის, „თურქეთის ავიახაზებთან“, ხუთ ავიაკომპანიასთან მიმდინარეობს მოლაპარაკებები და ამის შედეგად, 4.4 მლნ ლარით გაიზრდება „საქართველოს ფოსტის“ შემოსავლები“, - განაცხადა ირაკლი კობახიძემ.

პრემიერის თქმით, „საქართველოს ფოსტა“ მიმდინარე წელს მოგებაზე გასვლას ელოდება. მისი განცხადებით, კომპანიამ 2025 წელი 7 მლნ ლარის ზარალით დაასრულა, ხოლო წელს დადებით ფინანსურ შედეგზე გადასვლა იგეგმება. კობახიძის ინფორმაციით, ამის ერთ-ერთი მიზეზი ასევე არის შუამავალი კომპანიებიდან გარკვეული სერვისების „საქართველოს ფოსტაში“ დაბრუნება, რაც კომპანიას ყოველწლიურად დამატებით 14.2 მლნ ლარის შემოსავალს მოუტანს.