„საქართველოს მელიორაციამ“ სარწყავი სისტემების რეაბილიტაციისთვის 37.5 მილიონ ლარზე მეტი ღირებულების ხუთი ტენდერი გამოაცხადა

შპს „საქართველოს მელიორაციამ“ ქვეყნის სხვადასხვა რეგიონში სარწყავი ინფრასტრუქტურის რეაბილიტაციისთვის ჯამში 37.5 მილიონ ლარზე მეტი ღირებულების ხუთი ელექტრონული ტენდერი გამოაცხადა.

სახელმწიფო შესყიდვების სააგენტოს ვებგვერდზე გამოქვეყნებული ინფორმაციის მიხედვით, პროექტები ხრამ-არხის, ქვემო სამგორის, ქვემო ალაზნისა და ლომთაგორას სარწყავი სისტემების რეაბილიტაციას ითვალისწინებს. სამუშაოების დაფინანსება ეტაპობრივად 2026-2030 წლების ბიუჯეტებიდან განხორციელდება.

ყველაზე მსხვილი ტენდერი 12 511 954 ლარის ღირებულებისაა და ხრამ-არხის სარწყავი სისტემის მაგისტრალური არხის მართკუთხა კვეთის მონაკვეთის (პკ 26+08-დან პკ 68+32-ის ჩათვლით) რეაბილიტაციის მეორე რიგს მოიცავს. წინადადებების მიღება 14-19 აგვისტოს გაიმართება, ხოლო სამუშაოების შესრულების ვადა 1 034 კალენდარული დღეა.

მეორე ტენდერი, რომლის სავარაუდო ღირებულება 8 544 843 ლარია, ასევე ხრამ-არხის სარწყავი სისტემას ეხება. პროექტი ითვალისწინებს მაგისტრალური არხის საწყისი გარდამავალი უბნისა და ცალკეული მონაკვეთების რეაბილიტაციას, ასევე ორი ახალი საავტომობილო სახიდე გადასასვლელისა და აკვედუკის ახალი ავარიული წყალსაგდების მოწყობას. წინადადებების მიღება 13-18 აგვისტოს გაგრძელდება, ხოლო სამუშაოების შესრულების ვადა 854 კალენდარული დღეა.

7 939 870 ლარის ღირებულების კიდევ ერთი ტენდერი ქვემო სამგორის სარწყავი სისტემის მარცხენა მაგისტრალური არხის გ-22 გამანაწილებლისა და მისი II და III რიგის გამანაწილებლების რეაბილიტაციას ითვალისწინებს. წინადადებების მიღება 16-21 აგვისტოს გაიმართება, ხოლო სამუშაოების შესრულების ვადა 550 კალენდარული დღეა.

27 ივლისს გამოცხადებული 6 198 102 ლარის ღირებულების ტენდერი სიღნაღისა და დედოფლისწყაროს მუნიციპალიტეტებში ქვემო ალაზნის სარწყავი სისტემის მაგისტრალური არხის ჰიდროტექნიკური ნაგებობების აღდგენა-რეაბილიტაციის მესამე ეტაპს მოიცავს. განაცხადების მიღება 20-25 აგვისტოს გაიმართება, ხოლო სამუშაოების შესრულების ვადა 488 კალენდარული დღეა.

გარდა ამისა, „საქართველოს მელიორაციამ“ მარნეულის მუნიციპალიტეტში ლომთაგორას მაგისტრალური სარწყავი არხის რეაბილიტაციისთვის 2 284 525 ლარის ღირებულების ტენდერიც გამოაცხადა. წინადადებების მიღება 15-20 აგვისტოს გაგრძელდება, ხოლო პროექტის განხორციელებისთვის 200 კალენდარული დღეა განსაზღვრული.

სატენდერო დოკუმენტაციის მიხედვით, ხუთივე პროექტის ჯამური სავარაუდო ღირებულება 37 479 294 ლარს შეადგენს.