საქართველოში დაგეგმილია ყაზახეთის პრეზიდენტის, კასიმ-ჟომარტ ტოკაევის ვიზიტი - მთავრობის ადმინისტრაცია
საქართველოში დაგეგმილია ყაზახეთის პრეზიდენტის, კასიმ-ჟომარტ ტოკაევის ვიზიტი. ამის შესახებ მთავრობის ადმინისტრაცია იტყობინება, თუმცა თარიღი დაკონკრეტებული არ არის.
ამჯერად კი, საქართველოში ოფიციალური ვიზიტით იმყოფება ყაზახეთის შინაგან საქმეთა მინისტრი ერჟან სადენოვი, რომელსაც ირაკლი კობახიძე შეხვდა.
"მთავრობის ადმინისტრაციაში გამართულ შეხვედრაზე საუბარი საქართველოსა და ყაზახეთს შორის არსებულ ურთიერთობებს შეეხო. მხარეებმა განიხილეს ქვეყნებს შორის სამართალდაცვით და უსაფრთხოების სფეროებში თანამშრომლობა, როგორც ორმხრივ, ისე რეგიონულ კონტექსტში.
შეხვედრაზე ყურადღება გამახვილდა პოლიტიკური და ეკონომიკური ურთიერთობების გაღრმავების პერსპექტივებზე. ამ კუთხით ხაზი გაესვა მაღალი დონის ვიზიტების მნიშვნელობას.
აღინიშნა, რომ ყაზახეთის პრეზიდენტის, კასიმ-ჟომარტ ტოკაევის საქართველოში დაგეგმილი ვიზიტი კიდევ უფრო გაამყარებს ორ ქვეყანას შორის პარტნიორობას.
შეხვედრას შინაგან საქმეთა მინისტრი სულხან თამაზაშვილი ესწრებოდა", - იტყობინება მთავრობის ადმინისტრაცია.
BM.GE
წყარო: bm.ge