საქართველოში EU-დან ჩამოსულმა 474 ათასმა ვიზიტორმა უფრო მეტი დახარჯა, ვიდრე 1.3 მლნ-მა რუსეთიდან

ევროკავშირიდან საქართველოში ჩამოსული ვიზიტორები ერთ ვიზიტზე საშუალოდ უფრო მეტს ხარჯავენ, ვიდრე რუსეთიდან.

ეროვნული ბანკისა და ტურიზმის ადმინისტრაციის მიერ გამოქვეყნებული სტატისტიკა აჩვენებს, რომ წელს 9 თვეში საქართველოში ევროკავშირიდან [დიდი ბრიტანეთის ჩათვლით] 29%-ით გაიზარდა ტურიზმის შემოსავლები და 665.3 მლნ დოლარი შეადგინა, მაშინ როცა რუსეთიდან შემოსავლებში 14.5%-იანი ზრდა ფიქსირდება და 641.3 მლნ დოლარს შეადგენს. მიმდინარე წლის 9 თვეში ევროკავშირიდან ჯამში 473 620 ვიზიტი განხორციელდა, რაც 20%-ით გაზრდილი მაჩვენებელია. ეს ნიშნავს, რომ ევროკავშირის შემთხვევაში, ვიზიტზე საშუალო ხარჯი 1405 დოლარს შეადგენს. შედარებისთვის რუსეთიდან 1 306 623 ვიზიტორმა ერთ ვიზიტზე საშუალოდ 491 დოლარი დახარჯა. შესაბამისად, ევროკავშირიდან და დიდი ბრიტანეთიდან ჩამოსული ვიზიტორები, საშუალოდ, თითქმის 3-ჯერ მეტს ხარჯავენ რუს ტურისტებზე.

რაც შეეხება სხვა მონაცემებს, ევროკავშირის ქვეყნებიდან ყველაზე მეტი ვიზიტი გერმანიიდან განხორციელდა 80 104 ვიზიტი (წლიური ზრდა 21%-ია). მეორე ადგილზეა პოლონეთი 74 341 ვიზიტით, რაც წლიურად 16%-ით გაზრდილი მაჩვენებელია. მესამე ადგილს გაერთიანებული სამეფო იკავებს 41 032 ვიზიტით, აქ წლიური ზრდა 19.5%-ს შეადგენს, მეოთხე ადგილს საფრანგეთი იკავებს 32 143 ვიზიტით, რაც 22%-ით გაზრდილი მაჩვენებელია, მეხუთე ადგილზე 28 826 ვიზიტით იტალიაა, რაც წლიურად 32%-იანი ზრდაა.

ქვეყნები, საიდანაც ქართულმა ტურიზმმა იანვარ-სექტემბერში ყველაზე მეტი შემოსავალი მიიღო:

• ევროკავშირი [დიდი ბრიტანეთის ჩათვლით] - 665.3 მლნ დოლარი; ზრდა 29%; • რუსეთი - 641.3 მლნ დოლარი; ზრდა 14.5%; • ისრაელი - 457.6 მლნ დოლარი; ზრდა 6.4%; • თურქეთი - 428.2 მლნ დოლარი; კლება -5.7%; • აზერბაიჯანი - 186.4 მლნ დოლარი; ზრდა 10%; • უკრაინა - 167.4 მლნ დოლარი; ზრდა 46%; • სომხეთი - 135.1 მლნ დოლარი; ზრდა 6%; • ბელარუსი - 84 მლნ დოლარი; ზრდა 15.5%; • საუდის არაბეთი - 82.9 მლნ დოლარი; კლება -33.5%; • ირანი - 53.7 მლნ დოლარი; კლება -46%;