საქართველოში ოჯახის საშუალო ყოველთვიური ხარჯი ₾1936-ია, თანხის 38.7% სურსათზე მოდის - საქსტატი

საქსტატის მიერ გამოქვეყნებული ანგარიშის თანახმად, საქართველოში ერთი შინამეურნეობის, ანუ ოჯახის საშუალო ყოველთვიური ხარჯი 1936 ლარს შეადგენს, რაც ოჯახის ერთ წევრზე გაანგარიშებით თვეში 603 ლარს შეადგენს. საქსტატის თანახმად, მოსახლეობის დანახარჯები 2025 წელს 11.6%-ით, ანუ 200 ლარით, ერთი ადამიანის ყოველთვიური დანახარჯები კი 63 ლარით გაიზარდა.

საქსტატის თანახმად, მოსახლეობის მთლიან ხარჯებში გაიზარდა სურსათის წილი, თუკი 2024 წელს მთლიან ხარჯებში 38.1% მოდიოდა სურსათზე, 2025 წელს სურსათის დანახარჯების წილმა 38.7%-ს მიაღწია, მეორე პოზიციაზეა 11.4%-ით სატრანსპორტო ხარჯები, მესამე ადგილზეა 11.3%-ით კომუნალური ხარჯები; მეოთხე პოზიციას 11%-ით ჯანდაცვის და მედიკამენტების ხარჯები იკავებს; მეხუთეზეა 5.8%-ით ტანსაცმელი; 5.1%-ით საოჯახო მოხმარების გრძელვადიანი საქონელი (ავეჯი; ელ. ტექნიკა და სხვა); 2.9% მოდის განათლების ხარჯებზე, ხოლო 13.7% კი ყველა სხვა სამომხმარებლო ხარჯზე.

ამასთან, ქალაქი-სოფლის ჭრილში სასურსათო დანახარჯები მთლიან ხარჯებში უფრო მაღალია სოფლად, სადაც ის 41.6%-ს აღწევს, ქალაქებში კი 37.5%-ია, თუმცა მთლიანობაში ეროვნულ დონეზე მოსახლეობის ფულადი ხარჯების 38.7% სწორედ სასურსათო ხარჯებზე მოდის.