სასტუმროების ბიზნესში საინვესტიციო ინტერესი რეგიონებისკენ ინაცვლებს - ქეთევან მელაძე

სასტუმროების ბიზნესში საინვესტიციო ინტერესი რეგიონებისკენ ინაცვლებს - ამის შესახებ BMG-სთან „საქართველოს სასტუმროებისა და რესტორნების ფედერაციის“ ხელმძღვანელი ქეთევან მელაძე აცხადებს.

მისი განმარტებით, თუ 10-15 წლის წინ ძირითადი საინვესტიციო „ბუმი“ დედაქალაქზე მოდიოდა, დღეს ვითარება შეცვლილია და ბაზარი უფრო მეტად რეგიონული განვითარებისკენ არის მიმართული.

„დიდ ინვესტიციებს რომ დებდნენ და „ბუმი“ იყოს, რასაკვირველია, ამას თქვენც კარგად იგრძნობდით. დღესდღეობით, ნამდვილად არ არის ასეთი „ბუმი“ საქართველოში. თუმცა, გარკვეული მშენებლობები მიდის - მე რა შეხებაც მაქვს, საზღვარგარეთ მცხოვრები ქართველებიც საკმაოდ დაინტერესებულები არიან და საკმაოდ დიდ იმედებს ამყარებენ, იმიტომ რომ საქართველოს ბუნება და მდებარეობა საკმაოდ მიმზიდველია“ - აცხადებს ქეთევან მელაძე BMG-სთან.

ამასთან, მისივე თქმით, თბილისსა და ბათუმში ბაზარი გაჯერებულია. თუმცა, რეგიონში სასტუმროების განვითარებით ბევრი ემიგრანტი ინტერესდება.

„როგორც ამ სფეროში მომუშავე ადამიანი, დღესდღეობით, ნამდვილად ვერავის ვურჩევ - შემოდი და ჩადე ინვესტიცია - როცა იცი, რა შედეგი შეიძლება მიიღო. თუ მათი სურვილია რასაკვირველია, ისინი არც გეკითხებიან - ბაზარზე შემოდიან. თუმცა, რეგიონებში უფრო არის ინტერესი, მაგალითად, გორში - გორელი, რომელიც პირობითად, წასულია ქვეყნიდან, ის ბრუნდება და სასტუმროს აშენებს გორში, იმიტომ რომ ეს პრეცედენტი შექმნა „გორი ინნ“-მა და ნახა რომ საკმაოდ მოგებიანი იყო - ქუთაისიდან ჩამოსული სტუმრები აუცილებლად ჩერდებიან გორში“ - აცხადებს ქეთევან მელაძე.