საწვავზე უნაღდო დანახარჯები 27%-ით გაიზარდა, საშუალო ჩეკი 56 ლარია - „თიბისი კაპიტალის“ კვლევა

2026 წლის აპრილში, წინა წლის ანალოგიურ პერიოდთან შედარებით, საწვავზე მოსახლეობის უნაღდო დანახარჯები მნიშვნელოვნად 27%-ით გაიზარდა, ხოლო საშუალო დანახარჯმა ერთ ტრანზაქციაზე (საშუალო ჩეკი) 56 ლარი შეადგინა. აღნიშნული მონაცემები „თიბისი კაპიტალის“ მომხმარებელთა დანახარჯების დინამიკის ყოველთვიურ მიმოხილვაშია მოცემული.

კვლევის თანახმად, აპრილის თვეში თიბისი ბანკის არხებით გაწეული მომხმარებელთა ჯამური უნაღდო დანახარჯები წლიურად 13%-ით, ხოლო ტრანზაქციების რაოდენობა 15%-ით არის გაზრდილი. ჯამური დანახარჯების უდიდესი ნაწილი (64%) საქონელზე მოდის, ხოლო 36% მომსახურების სექტორზე ნაწილდება.

გთავაზობთ კვლევის დეტალებს იმის შესახებ, თუ კონკრეტულად რაში ხარჯავს მოსახლეობა ფულს და რა მოცულობისაა საშუალო ჩეკი სხვადასხვა კატეგორიაში:

სურსათი და აფთიაქები

• სურსათი: ჯამურ უნაღდო დანახარჯებში ყველაზე დიდი წილი — 30% კვლავ სურსათს უკავია. ამ მიმართულებით უნაღდო დანახარჯები წლიურად 17%-ით არის გაზრდილი. საშუალო ჩეკი ერთ ტრანზაქციაზე 17 ლარს შეადგენს. კვლევაში აღნიშნულია საქსტატის მონაცემიც, რომლის მიხედვითაც, სურსათსა და უალკოჰოლო სასმელებზე წლიურმა ინფლაციამ 8% შეადგინა. • ფარმაცია: აფთიაქებში უნაღდო დანახარჯების მოცულობა წლიურად 20%-ით გაიზარდა, ხოლო საშუალო ჩეკი ერთ შესყიდვაზე 28 ლარია.

ტანსაცმელი და აქსესუარები

• ამ კატეგორიაში უნაღდო დანახარჯების 16%-იანი წლიური ზრდა ფიქსირდება. ამასთან, ტანსაცმლისა და აქსესუარების ყიდვისას მომხმარებლის საშუალო დანახარჯი ერთ ტრანზაქციაზე ყველაზე მაღალია სხვა ყოველდღიურ საქონელთან შედარებით და 106 ლარს შეადგენს.

რესტორნები და კვების ობიექტები

• რესტორნებში უნაღდო დანახარჯები წლიურად 15%-ით არის გაზრდილი. კვების ობიექტებში საშუალო ჩეკი 33 ლარს გაუტოლდა. • საინტერესოა, რომ რესტორნებში დანახარჯების უდიდესი წილი 72% საქართველოს რეზიდენტებზე მოდის (მათი ხარჯვა წლიურად 24%-ითაა გაზრდილი), ხოლო 28% — უცხოელ ვიზიტორებზე (არარეზიდენტებზე).

სასტუმროები - ერთადერთი სექტორი კლებით

• სხვა სფეროებისგან განსხვავებით, კლება ფიქსირდება სასტუმროებში, სადაც უნაღდო დანახარჯები წლიურად 7%-ით შემცირდა. ანალიტიკოსები ამას რეგიონში არსებულ გეოპოლიტიკურ დაძაბულობას უკავშირებენ, რის გამოც არარეზიდენტების ხარჯვა სასტუმროებში 11%-ით შემცირდა (მათზე სასტუმროების ბაზრის 81% მოდის). • მიუხედავად საერთო კლებისა, სასტუმროებში ერთი საშუალო ჩეკის მოცულობა საკმაოდ მაღალია და 439 ლარს შეადგენს. ამავდროულად, საქართველოს რეზიდენტების ხარჯვა ადგილობრივ სასტუმროებში წლიურად 14%-ითაა გაზრდილი.

შენიშვნა: კვლევაში წარმოდგენილი ზრდის ტემპები მოცემულია თიბისი ბანკის არხებით POS ტერმინალებისა და ელექტრონული კომერციის ხარჯვაზე დაყრდნობით და შესაძლოა მცირედით განსხვავდებოდეს ჯამური ბაზრის დინამიკისგან.