სომხეთის ახალარჩეული პარლამენტი შეიკრიბა - პრეზიდენტმა პრემიერად კვლავ ფაშინიანი დანიშნა

სომხეთის პრეზიდენტმა, ვაჰაგნ ხაჩატურიანმა პარტია „სამოქალაქო შეთანხმების“ ლიდერი ნიკოლ ფაშინიანი ქვეყნის პრემიერ-მინისტრად ხელახლა დანიშნა. შესაბამისი განკარგულება პრეზიდენტის ოფიციალურ ვებგვერდზე 2 აგვისტოს გამოქვეყნდა.

„კონსტიტუციის 149-ე მუხლის პირველი ნაწილის საფუძველზე ნიკოლ ფაშინიანი დაინიშნოს სომხეთის პრემიერ-მინისტრად“, - ნათქვამია პრეზიდენტის განკარგულებაში.

პრეზიდენტის გადაწყვეტილებას წინ უძღოდა ახლად არჩეული, მეცხრე მოწვევის ეროვნული კრების პირველი სხდომის გახსნა. კონსტიტუციური პროცედურის შესაბამისად, ახალი პარლამენტის უფლებამოსილების ცნობისთანავე ფაშიანიანმა პრეზიდენტს მთავრობის გადადგომის შესახებ განცხადებით მიმართა, რის შემდეგაც საპარლამენტო უმრავლესობამ მისი კანდიდატურა პრემიერ-მინისტრის პოსტზე ხელახლა წარადგინა. ახალი მინისტრთა კაბინეტის დაკომპლექტებისთვის კანონმდებლობით 15-დღიანი ვადაა განსაზღვრული.

7 ივნისს გამართული საპარლამენტო არჩევნების შედეგებით, ნიკოლ ფაშინიანის მმართველმა პარტიამ „სამოქალაქო შეთანხმება“ ხმების 49.7% მიიღო. ბიზნესმენ სამველ კარაპეტიანის ბლოკმა „ძლიერმა სომხეთმა“ - 23.27%, ხოლო ყოფილი პრეზიდენტის, რობერტ ქოჩარიანის ბლოკმა „სომხეთმა“ - 9.9%.

ახალ 105-წევრიან პარლამენტში მანდატები შემდეგნაირად გადანაწილდა:

• „სამოქალაქო შეთანხმება“ — 64 მანდატი (საპარლამენტო უმრავლესობა); • ბლოკი „ძლიერი სომხეთი“ — 29 მანდატი; • ბლოკი „სომხეთი“ — 12 მანდატი.

ამრიგად, ფაშინიანის პარტიამ მოიპოვა შესაძლებლობა, მთავრობა დამოუკიდებლად, კოალიციის გარეშე ჩამოაყალიბოს.

რამდენიმე ოპოზიციურმა პარტიამ 7 ივნისის არჩევნების შედეგები არ აღიარა და ხელისუფლება ადმინისტრაციული რესურსის გამოყენებაში, კანდიდატებზე ზეწოლასა და ხმების დათვლისას დარღვევებში დაადანაშაულა. ოპოზიციამ შედეგები საკონსტიტუციო სასამართლოში გასაჩივრა, თუმცა სასამართლომ შვიდი ოპოზიციური პარტიის სარჩელი არ დააკმაყოფილა და არჩევნების შედეგები ძალაში დატოვა.

2 აგვისტოს გამართულ პირველ სხდომაზე, ეროვნული კრების სპიკერობის კანდიდატმა რუბენ რუბინიანმა ოპოზიციას შესთავაზა, პარლამენტი ცივილიზებული დიალოგისა და კონსენსუსის პლატფორმად აქციონ. მან იქვე გააფრთხილა ოპოზიცია, რომ წინააღმდეგ შემთხვევაში, „სამოქალაქო შეთანხმების“ ფრაქცია მზად არის პოლიტიკური ოპონირებისთვის „ყველაზე მკაცრი ფორმებით“.

ნიკოლ ფაშინიანს სომხეთის პრემიერ-მინისტრის პოსტი 2018 წლის მაისიდან უკავია.