ტაივანის საკითხი, შესაძლოა, აშშ-ჩინეთის კონფლიქტის მიზეზი გახდეს
ჩინეთის ლიდერმა, სი ძინპინმა პრეზიდენტ დონალდ ტრამპთან პეკინში გამართული სამიტის დაწყებისას განაცხადა, რომ სავაჭრო მოლაპარაკებები პროგრესირებს, თუმცა ტაივანის ირგვლივ არსებულმა უთანხმოებამ შესაძლოა ქვეყნებს შორის ურთიერთობები სახიფათო გზით წაიყვანოს და სამხედრო დაპირისპირებამდეც კი მიიყვანოს.
როგორც ირკვევა, სი ძინპინმა ტაივანის საკითხი ყველაზე მნიშვნელოვან და მგრძნობიარე თემად დაასახელა. ჩინეთის საგარეო უწყების ინფორმაციით, ქვეყნის ლიდერმა ხაზგასმით აღნიშნა, რომ ამ საკითხის არასწორმა მართვამ შესაძლოა აშშ-ჩინეთის ურთიერთობები უკიდურესად სახიფათო მდგომარეობაში ჩააყენოს.
მიუხედავად მკაცრი გაფრთხილებისა, შეხვედრა პომპეზურ გარემოში წარიმართა, ტრამპმა კი სი ძინპინს "დიდი ლიდერი" უწოდა და სამიტს "ისტორიაში უდიდესი" უწოდა.
პარალელურად, ტრამპი ჩინეთისგან ირანზე ზეწოლას და კონფლიქტის დასასრულებლად შუამავლობას მოელის, თუმცა ანალიტიკოსებს ეჭვი ეპარებათ, რომ პეკინი თეირანის წინააღმდეგ მკაცრ ნაბიჯებს გადადგამს.
რაც შეეხება რეგიონულ უსაფრთხოებას, ტაივანის მინისტრთა კაბინეტის წარმომადგენელმა, მიშელ ლიმ ტაიპეიში განაცხადა, რომ ჩინეთის სამხედრო მუქარა რეგიონში დაუცველობის განცდას ქმნის. მისი თქმით, თავდაცვისუნარიანობის გაძლიერება და კოლექტიური შეკავება მშვიდობის უზრუნველყოფის კრიტიკული ფაქტორია.
შეგახსენებთ, რომ აშშ-სა და ჩინეთს შორის დიპლომატიური ურთიერთობები ტაივანის შეიარაღების საკითხზე დიდი ხანია დაძაბულია. ვაშინგტონი, მიუხედავად ოფიციალური დიპლომატიური კავშირების არქონისა, კანონით არის ვალდებული, კუნძულს თავდაცვითი საშუალებები მიაწოდოს, რასაც პეკინი კატეგორიულად ეწინააღმდეგება, რადგან ტაივანს საკუთარ სუვერენულ ტერიტორიად მიიჩნევს.
BM.GE
წყარო: bm.ge