თანამშრომლობის პოტენციალი გვაქვს საქართველოსთან, ირანთან, ჩრდ. კორეასთან და ბევრ სხვა ქვეყანასთან - ალექსეი შევცოვი
რუსეთის უშიშროების საბჭოს მდივნის მოადგილე, ალექსეი შევცოვი ამბობს, რომ რუსეთს შეუძლია მეგობარ და ნეიტრალურ ქვეყნებს რეგიონთაშორისი ეკონომიკური თანამშრომლობის ხელსაყრელი მოდელები შესთავაზოს და ასეთი თანამშრომლობის მნიშვნელოვანი პოტენციალი აქვს ირანთან, მონღოლეთთან, ჩრდილოეთ კორეასთან, აზერბაიჯანთან და საქართველოსთან. ამის შესახებ INTERFAX-ი წერს.
„რუსეთს, რა თქმა უნდა, შეუძლია რეგიონთაშორისი თანამშრომლობის ხელსაყრელი მოდელები შესთავაზოს და ამას ვაკეთებთ ისეთ ქვეყნებთან, როგორიცაა ჩინეთი, ბელარუსი, ყაზახეთი და ყველა მეგობარი და ნეიტრალური სახელმწიფო. ჩვენ თანამშრომლობის მნიშვნელოვანი პოტენციალი გვაქვს ირანთან, მონღოლეთთან, ჩრდილოეთ კორეასთან, აზერბაიჯანთან, საქართველოსთან და ბევრ სხვა ქვეყანასთან.
ჩემი აზრით, რეგიონთაშორისი კავშირების განვითარება მარტივი ვაჭრობისა და საქონლის გაცვლისგან ერთობლივი საწარმოო ჯაჭვების შექმნისკენ უნდა განვითარდეს“, - განაცხადა შევცოვმა აღმოსავლეთის ეკონომიკურ ფორუმზე (EEF) გამართულ დისკუსიაზე „რეგიონთაშორისი თანამშრომლობა ევრაზიაში“.
BM.GE
წყარო: bm.ge