თბილისში მჯდომ ჩინოვნიკს ჰგონია, რომ უკეთ იცის, რა სჭირდება მესტიის ან თერჯოლის სოფელს - ირაკლი მელაშვილი
თვითმმართველობის საკითხების სპეციალისტი ირაკლი მელაშვილი მთავრობას დეცენტრალიზაციის სტრატეგიის არქონაში ადანაშაულებს. მისი თქმით, 2020-2025 წლების სტრატეგიის დოკუმენტის ვადა ამოიწურა, თუმცა მომდევნო წლების პრიორიტეტებზე მუშაობა დაწყებულიც კი არ არის.
„სადმე გაგიგიათ, რომ ახალ დოკუმენტზე დაეწყოთ მუშაობა? 2026-2030 წლისთვის პრიორიტეტები განსაზღვრული რომ იყოს, 2024-ში მაინც უნდა დაწყებულიყო ამაზე მუშაობა. არანაირი დოკუმენტი არ არის შედგენილი, შესაბამისად, არ არსებობს არანაირი პრიორიტეტები მთავრობის დეცენტრალიზაციასთან დაკავშირებით“ - აცხადებს მელაშვილი BMG-სთან.
მისი შეფასებით, ქვეყანაში ინსტიტუციური მართვის ნაცვლად, პერსონებზე დამოკიდებული გადაწყვეტილებები მიიღება.
„მთელ მსოფლიოში, ნორმალურ ქვეყნებში ხდება ასე: მთავრობისათვის რაც პრიორიტეტულია, ის იმუშავებს პოლიტიკის დოკუმენტს, რომელიც განსაზღვრავს საშუალოვადიან სტრატეგიას, იმ სფეროში ცვლილებებს. შემდეგ, ამ დოკუმენტის საფუძველზე მუშავდება სამოქმედო პროგრამები, პროგრამების საფუძველზე - პროექტები, მოსახლეობასაც, დაინტერესებულ პირებსაც, პოლიტიკოსებსაც, ჟურნალისტებსაც აქვთ შესაძლებლობა ყოველ ეტაპზე შეამოწმონ რა კეთდება, როგორ კეთდება, რას აკეთებს მთავრობა, რამდენად შეესაბამება იმ გეგმებს, რომელიც პოლიტიკის დოკუმენტში გაიწერა და ა.შ. არაფერი მსგავსი საქართველოში არ ხდება. პრემიერ-მინისტრები იცვლებიან, მაგრამ ეს მთავრობები ფაქტობრივად, წინააღმდეგი არიან თვითმმართველობის რეფორმის საქართველოში“ - ამბობს ირაკლი მელაშვილი.
სპეციალისტი ევროპულ დახმარებებზე უარის თქმის საკითხსაც ეხმაურება. მისი ინფორმაციით, საქართველომ უარი თქვა დაახლოებით 50-მილიონიან გრანტზე, რომელიც რეგიონების განვითარებას უნდა მოხმარებოდა.
„დღეს ეს დახმარება 200-300 მილიონი ევრო იქნებოდა. ევროპული გზის შეჩერება ნიშნავს იმას, რომ შენ არ აშენებ ევროპულ სახელმწიფოს. ჩვენ დღეს ვაშენებთ საბჭოთა, ცენტრალიზებულ სახელმწიფოს, სადაც თბილისში მჯდომ ჩინოვნიკს ჰგონია, რომ უკეთ იცის, რა სჭირდება მესტიის ან თერჯოლის სოფელს, ვიდრე ადგილობრივ მცხოვრებს“ - აცხადებს ირაკლი მელაშვილი.