Tesla-მ ბიტკოინში ინვესტიციით $112-მილიონიანი ზარალი მიიღო

გასულ კვარტალში Tesla-ს საკუთრებაში არსებული კრიპტოაქტივების ბალანსი უცვლელი დარჩა და კომპანია კვლავ 11,509 ბიტკოინს ფლობს, რაც დაახლოებით $786 მილიონს შეადგენს. ეს პოზიცია ავტომწარმოებელს 2022 წლის შემდეგ არ შეუმცირებია, როდესაც მან თავდაპირველი კრიპტოაქტივების პორტფელის 75% გაყიდა.

საინტერესოა, რომ გასულ კვარტალში ბიტკოინის ფასის 14%-იანმა ვარდნამ ბალანსზე $112-მილიონიანი ზარალი წარმოქმნა, თუმცა კომპანიას მონეტები მაინც არ გაუყიდია. ამას გარდა, საოპერაციო ხარჯების და კაპიტალური დაბანდებების მკვეთრი ზრდის გამო, კომპანიის თავისუფალი ფულადი ნაკადი უარყოფით მაჩვენებელზე, მინუს $1.1 მილიარდზე გავიდა.

რაც შეეხება ინსტიტუციურ კონტექსტს, Tesla კვლავ რჩება მსოფლიოში ერთ-ერთ უმსხვილეს საჯარო კომპანიად, რომელიც კრიპტოვალუტას ფლობს, თუმცა ის ბიტკოინში ინვესტიციას აღარ ზრდის.

ცნობისთვის, Tesla-მ ბიტკოინი პირველად 2021 წლის დასაწყისში $1.5 მილიარდად შეიძინა. მოგვიანებით ავტომწარმოებელმა აქტივების უდიდესი ნაწილი ლიკვიდურობის შენარჩუნების მიზნით გაყიდა, თუმცა დარჩენილ რეზერვებს 2022 წლის შემდეგ უცვლელად ინარჩუნებს.