ტრამპი არაბული ქვეყნებისგან "აბრაამის შეთანხმების" ხელმოწერას ითხოვს

ამერიკის შეერთებული შტატების პრეზიდენტმა, დონალდ ტრამპმა ირანის ისლამურ რესპუბლიკასთან მიმდინარე მოლაპარაკებების ფონზე, რეგიონის ლიდერებს ახალი პირობა წაუყენა.

როგორც ირკვევა, თეთრი სახლის ლიდერი პარტნიორი სახელმწიფოებისგან „აბრაამის შეთანხმებაზე“ მიერთებას მოითხოვს, რაც ირანთან საბოლოო ხელშეკრულების გაფორმების აუცილებელ წინაპირობად დაასახელა. დონალდ ტრამპის განცხადებით, ვაშინგტონი მხოლოდ მასშტაბურ და ყოვლისმომცველ შეთანხმებას განიხილავს, წინააღმდეგ შემთხვევაში, მოლაპარაკებების პროცესი შეწყდება და მხარეები სამხედრო დაპირისპირების რეჟიმს დაუბრუნდებიან.

არსებული ინფორმაციით, აშშ-ის პრეზიდენტმა აღნიშნული საკითხი საუდის არაბეთის, არაბთა გაერთიანებული საამიროების, კატარის, პაკისტანის, თურქეთის, ეგვიპტის, იორდანიისა და ბაჰრეინის ლიდერებთან გამართულ მოლაპარაკებებზე უკვე დასვა. დონალდ ტრამპის გეგმით, დოკუმენტზე ხელმოწერის პროცესი საუდის არაბეთმა და კატარმა დაუყოვნებლივ უნდა დაიწყონ, რასაც შემდგომში სხვა სახელმწიფოებიც შეუერთდებიან.

თეთრი სახლის ლიდერი მიიჩნევს, რომ ამ პროცესში ჩართვაზე უარის თქმა არაკეთილსინდისიერ განზრახვაზე მიუთითებს. ამასთან, ხელშეკრულების გაფორმების შემთხვევაში, შორეულ პერსპექტივაში „აბრაამის შეთანხმების“ წევრობა ირანსაც შეეძლება.

მნიშვნელოვანია ითქვას, რომ ამერიკულმა მხარემ საკუთარ წარმომადგენლებს შესაბამისი პროცედურების დაწყება და დასახელებული ქვეყნების „აბრაამის შეთანხმებაში“ ინტეგრირება უკვე დაავალა. ვაშინგტონის შეფასებით, რეგიონული კოალიციის შექმნა ახლო აღმოსავლეთში ხანგრძლივ მშვიდობას, უსაფრთხოებასა და ეკონომიკურ გაძლიერებას უზრუნველყოფს.

ცნობისთვის, არაბულ ქვეყნებსა და ისრაელს შორის ურთიერთობების ნორმალიზების პროცესს, რომელსაც საფუძველი 2020 წელს ჩაეყარა, „აბრაამის შეთანხმება“ ეწოდება. ამჟამად დოკუმენტის წევრები არაბთა გაერთიანებული საამიროები, ბაჰრეინი, მაროკო, სუდანი და ყაზახეთი არიან.