ტრამპის ადმინისტრაცია ქარის ორ ელექტროსადგურს იჯარის გადასახადს უუქმებს - მიზეზი

პრეზიდენტ დონალდ ტრამპის ადმინისტრაციამ აშშ-ის კიდევ ორი ოფშორული (საზღვაო) ქარის ელექტროსადგურისთვის იჯარის გაუქმებაზე შეთანხმებას მიაღწია, რის სანაცვლოდაც კომპანიებმა ადგილობრივ წიაღისეულ საწვავში $885 მილიონის ინვესტირების ვალდებულება აიღეს.

ეს პროექტები, რომელთაგან ერთი ატლანტის, ხოლო მეორე წყნარ ოკეანეში მდებარეობს, კომპანია Ocean Winds-ის მიერ იმართება.

ეს განცხადება მას შემდეგ კეთდება, რაც ერთი თვის წინ ფრანგულმა ენერგეტიკულმა გიგანტმა TotalEnergies-მა შინაგან საქმეთა დეპარტამენტთან მსგავს შეთანხმებას მიაღწია, რითაც ოფშორული ქარის ენერგიის იჯარებიდან $1 მილიარდი აშშ-ის ნავთობისა და გაზის წარმოებაში გადაამისამართა.

ეს გარიგებები ასახავს ტრამპის ახალ სტრატეგიას აშშ-ის ოფშორული ქარის ენერგიის პროექტების შესაჩერებლად, რომლებსაც პრეზიდენტმა მახინჯი, ძვირად ღირებული და არაეფექტიანი უწოდა.

"ახლა, როდესაც მშრომელი ამერიკელები აღარ აფინანსებენ ძვირად ღირებულ, არასაიმედო და წყვეტილ ენერგოპროექტებს, კომპანიები კვლავ დებენ ინვესტიციებს ხელმისაწვდომ, საიმედო და უსაფრთხო ენერგეტიკულ ინფრასტრუქტურაში," - განაცხადა შინაგან საქმეთა მდივანმა დაგ ბურგუმმა.

ოფშორული ქარის ენერგიის ინდუსტრიის ჯგუფმა გააკრიტიკა ეს გარიგებები ისეთი პროექტების გაუქმების გამო, რომლებიც მკვეთრად მზარდი მოთხოვნის დასაკმაყოფილებლად საჭირო ელექტროენერგიას უზრუნველყოფდნენ.

ორივე პროექტი ერთობლივ საწარმოს წარმოადგენს. პროექტ "Bluepoint Wind"-ში, რომელიც ნიუ-იორკისა და ნიუ-ჯერსის სანაპიროებთან მდებარეობს, Ocean Winds აქტივების მმართველ კომპანია BlackRock-ის ერთ-ერთ ქვედანაყოფთან თანამშრომლობდა. ხოლო კალიფორნიის სანაპიროსთან მდებარე "Golden State Wind" პროექტში მისი პარტნიორი ლონდონში დაფუძნებული ოფშორული ქარის ენერგიის საინვესტიციო ფირმა Reventus Power იყო.

სააგენტოს ცნობით, BlackRock-ის ქვედანაყოფი, Global Infrastructure Partners (GIP), დათანხმდა, რომ "Bluepoint Wind"-ის საიჯარო თანხას - 765 მილიონ დოლარს - აშშ-ის თხევადი ბუნებრივი აირის (LNG) ობიექტში დააბანდებს.

გარდა ამისა, შინაგან საქმეთა დეპარტამენტის განცხადებით, Golden State Wind-ს შეეძლება 120 მილიონი დოლარის საიჯარო მოსაკრებლების დაბრუნება მას შემდეგ, რაც მსგავსი ოდენობის ინვესტიციას ნავთობისა და გაზის, ენერგეტიკულ ინფრასტრუქტურულ ან LNG პროექტებში განახორციელებს.