ტრამპის საინვესტიციო ანგარიშიდან 3,711 ტრეიდი განხორციელდა

ამერიკის შეერთებული შტატების პრეზიდენტის, დონალდ ტრამპის მიერ განხორციელებულმა უპრეცედენტო საფონდო აქტივობამ ბაზრის მონაწილეების დიდი ინტერესი გამოიწვია.

როგორც ირკვევა, გამოქვეყნებული ფინანსური დეკლარაციის მიხედვით, პრეზიდენტთან დაკავშირებულმა ანგარიშებმა 3,711 ტრანზაქცია განახორციელეს, რაც კრიტიკოსების მხრიდან ინსაიდერული ვაჭრობის შესახებ ეჭვებს აჩენს.

მიუხედავად ამისა, საინვესტიციო ექსპერტები ფიქრობენ, რომ ეს მოცულობა სავარაუდოდ ავტომატიზებულ, AI-მოდელზე დაფუძნებულ და პირდაპირი ინდექსირების სტრატეგიებს უკავშირდება.

Trump Organization-ის ოფიციალური განმარტების თანახმად, პრეზიდენტის აქტივებს საინვესტიციო ფონდის პროფესიონალი ტრეიდერები მართავენ, რომელთაც სრული კონტროლი აქვთ პორტფელის რებალანსირებასა და ასიგნებებზე, თავად პრეზიდენტს ან მის ოჯახს კი პროცესში მონაწილეობა არ მიუღია. ამასთან, ვიცე-პრეზიდენტმა ჯეი დი ვენსმა აბსურდული უწოდა ვარაუდს, რომ თეთრი სახლის ლიდერი ვაჭრობის გადაწყვეტილებებს ოვალური კაბინეტიდან იღებდა.

საპირისპიროდ, ოპოზიციური ფრთა მიუთითებს, რომ ტრანზაქციების ნაწილი ემთხვევა ადმინისტრაციის პოლიტიკურ ნაბიჯებს. კერძოდ, დემოკრატმა სენატორმა ელიზაბეთ უორენმა განაცხადა, რომ ჩინეთში მოწინავე ჩიპების ექსპორტის ავტორიზაციამდე კომპანია Nvidia-ს $1-მილიონიანი აქციების შესყიდვა კანონდარღვევა უნდა იყოს.

მნიშვნელოვანია ითქვას, რომ ტრანზაქციების უმრავლესობა, კერძოდ 2,000-ზე მეტი გარიგება, მარტში, ირანში მიმდინარე კონფლიქტით გამოწვეული მაღალი ვოლატილობის პერიოდში დაფიქსირდა. კომპანია Vise-ის თანადამფუძნებლის, სამირ ვასავადას განმარტებით, ტრანზაქციების ასეთი სიმრავლე გადასახადების ოპტიმიზაციის სტრატეგიას ასახავს, რაც მაღალი კაპიტალის მქონე ინვესტორებშია გავრცელებული.