ტრამპმა ფედერალური რეზერვისგან საპროცენტო განაკვეთის 1%-მდე შემცირება მოითხოვა

აშშ-ის პრეზიდენტი დონალდ ტრამპი ქვეყნის ფედერალური რეზერვის მიერ რეფინანსირების განაკვეთის 25 პროცენტული პუნქტით გაზრდას გამოეხმაურა. მან მის მიერვე დანიშნულ თავმჯდომარე კევინ უორშს ნდობა გამოუცხადა, თუმცა ცენტრალური ბანკისგან მონეტარული პოლიტიკის მკვეთრი შერბილება და საპროცენტო განაკვეთის 1%-მდე ან უფრო დაბალ ნიშნულამდე დაწევა მოითხოვა.

ცნობისთვის, 16 სექტემბერს, მონეტარული პოლიტიკის კომიტეტის 12 წევრმა საპროცენტო განაკვეთის 3.75%-4.00%-ის დიაპაზონამდე გაზრდას მხარი გუშინ ერთხმად დაუჭირა. ეს გადაწყვეტილება 2023 წლის შემდეგ განაკვეთის მომატების პირველი შემთხვევა იყო.

დონალდ ტრამპმა ჟურნალისტებთან საუბრისას დაადასტურა, რომ უორშის მიმართ ნდობას ინარჩუნებს, თუმცა მისი თქმით, მმართველთა საბჭოს წევრები საკუთარი პოლიტიკური ინტერესებით მოქმედებენ. ამერიკის პრეზიდენტმა საბჭოს წევრები თეთრი სახლის ადმინისტრაციის ეკონომიკური შედეგების მიზანმიმართულ გაუარესებაში დაადანაშაულა.

ტრამპის განცხადებების პარალელურად, FED-ის გადაწყვეტილებასთან დაკავშირებით თავისი პროგნოზი გაავრცელა საინვესტიციო ბანკმა Goldman Sachs-მა, რომლის ანალიტიკოსების შეფასებითაც, ფედერალური რეზერვი მონეტარულ პოლიტიკას ოქტომბრის თვეში კიდევ ერთხელ, 25 საბაზისო პუნქტით გაზრდის.

ანალიტიკოსებმა საკუთარი მოლოდინი დააფუძნეს ცენტრალური ბანკის იმ განახლებულ პროგნოზებზე, რომელთა მიხედვითაც კომიტეტის წევრთა უმრავლესობა მიმდინარე წელს მონეტარული პოლიტიკის კიდევ უფრო გამკაცრებას ემხრობა.