ტრამპს 51-ე შტატად ამჯერად ვენესუელის მიერთება სურს

ტრამპმა სამშაბათს თავის Truth Social ანგარიშზე პროვოკაციული გრაფიკა გამოაქვეყნა. რუკაზე ვენესუელა ამერიკის დროშის ფონზე იყო გამოსახული, წარწერით "51-ე შტატი".

ეს ფერადი პოსტი მას შემდეგ გამოჩნდა, რაც ტრამპმა ორშაბათს Fox News-თან საუბარში განაცხადა, რომ სამხრეთამერიკული ქვეყნის აშშ-ის ნაწილად ქცევას განიხილავდა.

"ახლახან დავასრულე სატელეფონო საუბარი დონალდ ტრამპთან... მან მითხრა, რომ სერიოზულად განიხილავს ვენესუელას 51-ე შტატად გამოცხადებას," - დაწერა ორშაბათს დილით პლატფორმა X-ზე Fox’s America Reports-ის ჟურნალისტმა ჯონ რობერტსმა.

მისმა კოლეგამ Fox-დან, ბილ მელუგინმა ასევე დაწერა X-ზე და აღნიშნა, რომ ტრამპის თქმით, "იქ 40 ტრილიონი დოლარის ღირებულების ნავთობია და ვენესუელას ტრამპი უყვარს".

ვენესუელას პრეზიდენტის მოვალეობის შემსრულებელმა დელსი როდრიგესმა ტრამპის სურვილებს უპასუხა და განაცხადა, რომ მის ქვეყანას 51-ე შტატად ქცევის გეგმა არ აქვს.

როდრიგესმა ძალაუფლება იანვარში მას შემდეგ გადაიბარა, რაც ტრამპის მიერ სანქცირებული აშშ-ის სამხედრო ოპერაციის შედეგად იმდროინდელი პრეზიდენტი ნიკოლას მადურო დაამხეს.

"ჩვენ გავაგრძელებთ ჩვენი მთლიანობის, სუვერენიტეტის, დამოუკიდებლობისა და ჩვენი ისტორიის დაცვას. ვენესუელა არის არა კოლონია, არამედ თავისუფალი ქვეყანა" - განუცხადა როდრიგესმა ჟურნალისტებს ორშაბათს ჰააგაში.

წელს ტრამპმა ვენესუელასთან დაკავშირებულ თავის სურვილებზე უკვე რამდენჯერმე მიანიშნა.

მარტში, მაიამიში გამართულ მსოფლიო ბეისბოლის კლასიკის ნახევარფინალში ვენესუელის მიერ იტალიის დამარცხების შემდეგ, პრეზიდენტმა Truth Social-ზე თავისი მოსაზრებები გააზიარა: "ბოლო დროს ვენესუელაში კარგი რაღაცები ხდება! ნეტავ, რა ჯადოქრობაა ეს? შტატის სტატუსი, #51, ვინმეს გსურთ?"

ვენესუელის ექსპრეზიდენტი მადურო და მისი მეუღლე, პირველი ლედი სელია ფლორესი, 2 იანვარს შუაღამისას აშშ-ის ძალებმა დედაქალაქ კარაკასზე მასშტაბური თავდასხმის ფარგლებში "დააკავეს".

თავდასხმის შემდეგ ტრამპმა განაცხადა, რომ ახლა ვენესუელას ამერიკა "მართავდა".

"ეს ახლა მკვდარი ქვეყანაა. ინფრასტრუქტურის აღსადგენად ნავთობინდუსტრიების მხრიდან დიდი ინვესტიციების განხორციელება მოგვიწევს," - დასძინა მან.

ვენესუელამდე ტრამპმა აშშ-ის 51-ე შტატად გრენლანდიის შემოერთების იდეა გააჟღერა, რასაც ადგილობრივების მხრიდან პროტესტიც კი მოჰყვა.