"წარმომადგენლობა ერევანში და ბაქოში გვაქვს" - "პოლიმერ ჯგუფის" გაყიდვებში ექსპორტის წილი 20%-მდე გაიზარდა

კომპანია „პოლიმერ ჯგუფის“ ექსპორტის წილი კომპანიის მთლიან გაყიდვებში ამ დროისთვის დაახლოებით 18-20%-ს შეადგენს. ამის შესახებ BM.GE-ს „პოლიმერ ჯგუფის“ კომერციულმა დირექტორმა ზურაბ ფხაკაძემ განუცხადა.

მისი თქმით, კომპანიამ, რომელიც ბაზარზე “ბიოტოპის” სახელითაა წარმოდგენილი, ექსპორტზე გასვლა დაახლოებით ორი წლის წინ დაიწყო და ამ ეტაპზე პროდუქცია სომხეთსა და აზერბაიჯანში გააქვს. ფხაკაძის ინფორმაციით, ორივე ქვეყანაში „პოლიმერ ჯგუფს“ საკუთარი წარმომადგენლობა აქვს.

„თავიდანვე იყო კომპანიის გეგმებში მასშტაბირება ამიერკავკასიის არეალზე. გავედით სომხეთის და აზერბაიჯანის ბაზარზე. ამ ეტაპზე გვაქვს წარმომადგენლობა ერევანში და ბაქოში“, - განაცხადა ფხაკაძემ.

საერთაშორისო ექსპანსიის მიუხედავად, კომპანიისთვის ამ ეტაპზე პრიორიტეტული ადგილობრივ ბაზარზე ზრდაა. მისივე განმარტებით, ადგილობრივ ბაზარზე კომპანიის გაყიდვები წლიურად დაახლოებით 30-35%-ით იზრდება. ამასთან, ბოლო სამი წლის განმავლობაში კომპანია დაახლოებით ორჯერ გაიზარდა. „საწყის ეტაპზე ექსპორტი 1-დან 3%-მდე იყო, ახლა უკვე მივსულვართ 18%-მდე, რაც თითქმის ექვსჯერ მეტია“, - აღნიშნა კომპანიის კომერციულმა დირექტორმა.

ფხაკაძის თქმით, ამ ეტაპზე კომპანიის მთავარი ფოკუსი ახალი საერთაშორისო ბაზრების ათვისებაზე მეტად საქართველოში განვითარებაა.

კომპანია “პოლიმერ ჯგუფი” ქართულ საწარმოს წარმოადგენს, რომელიც აწარმოებს თავისუფალი გადინების მილებს, სასმელი წყლის და სახანძრო ავზებს (მიწისქვეშა და მიწისზედა ტიპები), წნევის გამაძლიერებელ და კანალიზაციის სატუმბ სადგურებს, საყოფაცხოვრებო, სამრეწველო და წვიმის წყლის ჩამდინარე წყლების გამწმენდ საშუალებებს და ასევე კომერციულ ობიექტებისა და კერძო სახლებისთვის ბიოლოგიურ გამწმენდ ნაგებობებს. საწარმოო ფართობი განლაგებულია 4500კვ.მ-ზე და დასაქმებულია 30-ზე მეტი მაღალკვალიფიციური თანამშრომელი. კომპანიის საწარმოო შესაძლებლობებიდან გამომდინარე შეუძლია აწარმოოს როგორც სერიული ტიპის, ასევე სხვადასხვა ტექნიკური სირთულის, ინდივიდუალურ პროექტებზე მორგებული დანადგარები.