"წლის ბოლოს შევაჯამოთ" - პრემიერი II კვარტალში FDI-ის კლებაზე

პრემიერ-მინისტრ ირაკლი კობახიძის განცხადებით, კონკრეტულ კვარტალში პირდაპირი უცხოური ინვესტიციები შეიძლება კლებადი იყოს, თუმცა მთავრობა უფრო მეტად სრული წლის ჭრილში ინვესტიციების ჯამური მოცულობით არის დაინტერესებული. ამის შესახებ კობახიძემ BMG-ის კითხვაზე პასუხისას განაცხადა.

"კვარტალიდან კვარტალამდე შეიძლება იყოს განსხვავებული სტატისტიკა. საბოლოო ჯამში ერთად დავაჯამოთ საშუალო წლიური სტატისტიკა და ამის მიხედვით შეგვიძლია გამოვიტანოთ დასკვნები. წლის ბოლოს შევაჯამოთ", - განაცხადა BMG-ის კითხვაზე პასუხისას პრემიერ-მინისტრმა ირაკლი კობახიძემ.

2026 წლის პირველ ნახევარში საქართველოში 750 მილიონი დოლარის პირდაპირი უცხოური ინვესტიცია (FDI) შემოვიდა, რაც 2025 წლის ანალოგიურ პერიოდთან შედარებით 21%-ით, ანუ 210 მილიონი დოლარით ნაკლებია. მათ შორის, 2026 წლის I კვარტალში საქართველოში პირდაპირი უცხოური ინვესტიციების მოცულობამ 281 მილიონი დოლარი შეადგინა, რაც 2025 წლის I კვარტალის დაზუსტებულ მაჩვენებელზე 19.7%-ით ნაკლებია. 2026 წლის II კვარტალში კი, წინასწარი მონაცემებით, საქართველოში 468.8 მილიონი დოლარის პირდაპირი უცხოური ინვესტიცია განხორციელდა. ეს 2025 წლის II კვარტალის დაზუსტებულ მონაცემზე 23.2%-ით ნაკლებია.