"თუ მოისვრი, მობრუნდება" – "ვისოლმა" გზისპირა დაბინძურების შემცირების კამპანია დაიწყო

კომპანია „ვისოლმა“ ახალი გარემოსდაცვითი კამპანია „თუ მოისვრი, მობრუნდება“ დაიწყო, რომლის მიზანიც გზისპირა დაბინძურების შემცირება, ავტომობილით გადაადგილებისას პასუხისმგებლიანი ქცევის წახალისება და გარემოზე ზრუნვის მნიშვნელობის შესახებ საზოგადოების ცნობიერების ამაღლებაა. კამპანიის შესახებ BMGTV-ის გადაცემაში „ქალების ნარატივი“ "ვისოლის" საზოგადოებასთან ურთიერთობისა და CSR სამსახურის ხელმძღვანელმა რუსუდან კბილაშვილმა და კავკასიის რეგიონული გარემოსდაცვითი ცენტრის დირექტორმა სოფიკო ახობაძემ ისაუბრეს.

რუსუდან კბილაშვილის განცხადებით, „ვისოლი“, რომელიც საქართველოში ავტომობილით გადაადგილებისთვის საჭირო ინფრასტრუქტურას უკვე 26 წელია ქმნის, მიიჩნევს, რომ კეთილი მგზავრობა სუფთა გარემოდან იწყება.

„გვჯერა, რომ თითოეულმა ჩვენგანმა უნდა ვიგრძნოთ პასუხისმგებლობა იმ გარემოს მიმართ, სადაც ვცხოვრობთ და ვმოგზაურობთ. სწორედ ეს იყო მიზეზი, რატომაც დავიწყეთ გარემოსდაცვითი მასშტაბური კამპანია "თუ მოისვრი, მობრუნდება" REC Caucasus-თან თანამშრომლობით“, - განაცხადა მან.

მისივე თქმით, კამპანია ეფუძნება ბუმერანგის ეფექტის იდეას - ერთი შეხედვით მცირე ქმედებასაც კი შეიძლება მნიშვნელოვანი შედეგი მოჰყვეს, რომელიც საბოლოოდ საზოგადოებასა და გარემოს უბრუნდება.

„გვინდა ავამაღლოთ ცნობიერება იმის შესახებ, რომ ავტომობილიდან გადაგდებული ერთი ნარჩენიც კი გავლენას ახდენს გარემოზე და ეს გავლენა საბოლოოდ ისევ ჩვენ გვიბრუნდება“, – აღნიშნა რუსუდან კბილაშვილმა.

კამპანიაში „ვისოლის“ შვილობილი კომპანიებიც ერთვებიან, მათ შორის „სმარტი“, „ვენდი“, „დანკინი“, „საბვეი“ და „ალმა“. პროექტის ფარგლებში დაგეგმილია როგორც საინფორმაციო აქტივობები, ისე პრაქტიკული ნაბიჯები.

კავკასიის რეგიონული გარემოსდაცვითი ცენტრის დირექტორის სოფიკო ახობაძის განცხადებით, კვლევებმა აჩვენა, რომ გზისპირა დაბინძურების ერთ-ერთი მთავარი წყარო პლასტმასის ნარჩენებია.