თუ Platts-ზე საწვავი კიდევ გაიაფდება, ივნისის ბოლოდან მნიშვნელოვან ფასდაკლებებს უნდა ველოდოთ - Socar Georgia

საერთაშორისო ბაზარზე საწვავის გაიაფების ტენდენციის გაგრძელების შემთხვევაში, Socar-ში ივნისის ბოლოდან, ივლისის დასაწყისში საქართველოში საწვავის ფასების შემცირებას პროგნოზირებენ. ამის შესახებ "სოკარ ჯორჯია პეტროლეუმის", დირექტორმა ნოდარ ყანჩაველმა „საქმიან დილაში“ განაცხადა და აღნიშნა, რომ წინასწარ იმის განჭვრეტა როგორ განვითარდება მოვლენები რთულია.

ნოდარ ყანჩაველი იმასაც აღნიშნავს, რომ საქართველოში ნავთობიმპორტიორმა და საწვავის რეალიზატორმა კომპანიებმა ფასი იმაზე ნაკლებად გაზარდეს, ვიდრე მსოფლიოში გაიზარდა. ეს კი მარაგების ხარჯზე მოხდა.

„პირველი მარტიდან ახლო აღმოსავლეთში დაწყებული კონფლიქტის შედეგად მნიშვნელოვნად გაიზარდა საწვავის ფასები. ბენზინის თვითღირებულება დაახლოებით 60%-ით, ხოლო დიზელის ნაწილში 80%-ით გაიზარდა, საქართველოში ამხელა ზრდა არ მომხდარა, კომპანიებს ვისაც ჰქონდათ მარაგები, რაც დაახლოებით 1-2 თვიანი მარაგია, შევძელით ფასების მეტ-ნაკლებად შენარჩუნება და ზრდა მხოლოდ 40-50%-ის ფარგლებში იყო, მაშინ როდესაც თვითღირებულება 70%-ით გაგვეზარდა.

დღეისთვის „პლატსის“ ფასი დაახლოებით 6%-ით ბენზინის და 10%-ით დიზელის ნაწილში ქვემოთ მოდის ივნისის დასაწყისში არსებული მონაცემებით, შესაბამისად მნიშვნელოვანი როგორ დასრულდება ივნისის თვე. დღეს ჩვენ და სხვა კომპანიებიც მაისის მარაგებით ოპერირებენ, თუ ივნისში ფასების შემცირების ტრენდი შენარჩუნდება და პლატსზე ფასები შემცირდა, ივნისის ბოლოდან ივლისში მნიშვნელოვან ფასდაკლებებს უნდა ველოდოთ. ამის წინასწარ განჭვრეტა ფაქტობრივად შეუძლებელია, ეს დაახლოებით იმას ნიშნავს რომ ლონდონის საფონდო ბირჟაზე აქციების ფასი წინასწარ თქვას ვინმემ - ამის წინასწარ თქმა გამორიცხულია. ეს მნიშვნელოვნად დამოკიდებულია მსოფლიოში და ამ შემთხვევაში ახლო აღმოსავლეთ არსებულ სიტუაციაზე“, - განაცხადა ნოდარ ყანჩაველმა.