უკრაინამ რუსეთის სამხედრო-სამრეწველო კომპლექსის მნიშვნელოვან ობიექტებზე იერიში მიიტანა

უკრაინის თავდაცვის ძალებმა 6-7 ივლისის ღამეს რუსეთის ტერიტორიასა და დროებით ოკუპირებულ ყირიმში რამდენიმე სტრატეგიული დანიშნულების სამხედრო და საწარმოო ობიექტი დააბომბეს.

უკრაინის შეიარაღებული ძალების გენერალური შტაბის ინფორმაციით, იერიშის ერთ-ერთი მთავარი სამიზნე ბრიანსკში მდებარე სააქციო საზოგადოება Kremniy El Group-ი გახდა, რომელიც რუსეთის მიკროელექტრონიკის ბაზარზე ერთ-ერთ წამყვან მწარმოებელს შეადგენს. საწარმოში დამზადებული მიკროჩიპები, დენის ნახევარგამტარები და ელექტრონული კომპონენტები რუსული სამხედრო მართვის, კავშირგაბმულობის, ელექტრონული ბრძოლის სისტემებისა და სხვადასხვა სახის შეიარაღების შესაქმნელად აქტიურად გამოიყენება.

ამასთან, უკრაინულმა მხარემ იერიში ბრიანსკის ოლქის ქალაქ სელცოში მდებარე ქიმიურ ქარხანაზეც მიიტანა. გენერალური შტაბის განცხადებით, აღნიშნული ობიექტის ტერიტორიაზე ოთხი ძლიერი აფეთქება დაფიქსირდა. დასახელებული ქარხანა რუსეთის თავდაცვითი მრეწველობის უმნიშვნელოვანესი ნაწილია, რადგან იქ ისეთი დენთი, ასაფეთქებელი ნივთიერებები და რაკეტის მყარი საწვავის კომპონენტები იწარმოება, რომელთა დახმარებით დამზადებულ საბრძოლო მასალასა და რაკეტებს რუსული არმია უკრაინის ტერიტორიის დასაბომბად მუდმივად იყენებს. პარალელურად, უკრაინის თავდაცვის ძალებმა ბელგოროდის აეროდრომზე მდებარე საწვავის საცავიც დააზიანეს.

რაც შეეხება მომხდარის ლოგისტიკურ შედეგებს, უკრაინულმა ავიაციამ და არტილერიამ დროებით ოკუპირებულ ყირიმში, დასახლებულ პუნქტებთან, როზდოლნესა და იჩკისთან მდებარე ორ სარკინიგზო ხიდზე წარმატებული იერიში განახორციელეს.

უკრაინელი სამხედროების განმარტებით, რუსული საოკუპაციო ძალები ამ ინფრასტრუქტურას სამხედრო ლოგისტიკისთვის, კერძოდ კი ცოცხალი ძალის, შეიარაღებისა და საბრძოლო მასალის გადასასროლად ინტენსიურად იყენებდნენ. ამავე ღამეს იერიშები დონეცკის ოლქში, ვოლნოვახასა და იასინუვატას რაიონებში მდებარე რუსეთის არმიის ტექნიკური უზრუნველყოფის საწყობებზეც განხორციელდა.

უკრაინის გენერალურ შტაბში აცხადებენ, რომ ქვეყნის თავდაცვის ძალები რუსეთის სამხედრო ობიექტებზე სისტემატურ დარტყმებს მომავალშიც გეგმავენ.