უკრაინამ რუსულ ენერგეტიკულ ინფრასტრუქტურაზე იერიში მიიტანა
უკრაინის სპეცოპერაციების ძალებმა ციმბირიდან ევროპისკენ მიმავალი ნავთობსადენის საკვანძო სადგური დაბომბეს.
უკრაინის შეიარაღებული ძალების უპილოტო საფრენმა აპარატებმა რუსეთში, კიროვის ოლქში მდებარე მსხვილი ნავთობსადენის საწარმოო სადგურსა და როსტოვის ოლქში მდებარე ნავთობბაზაზე იერიში მიიტანეს.
როგორც ირკვევა, 31 მაისის ღამით განხორციელებული თავდასხმის სამიზნე უკრაინის საზღვრიდან თითქმის 1200 კილომეტრის დაშორებით მდებარე ობიექტი „ლაზარევო“ იყო. დასახელებული პუნქტი ნავთობსადენ „სურგუტ-პოლოცკის“ საკვანძო კვანძს შეადგენს, რომლის საშუალებითაც ნედლეული ციმბირიდან და რუსეთის ჩრდილოეთ რეგიონებიდან ბალტიისპირეთის პორტებსა და ბელარუსში ტრანსპორტირდება.
არსებული ინფორმაციით, აღნიშნული სადგური ნავთობსადენების მთავარ სისტემა „დრუჟბასთანაც“ არის დაკავშირებული. ეს ინფრასტრუქტურა რუსულ მხარეს რუსეთის ევროპულ ნაწილში არსებულ ორ უმსხვილეს მაგისტრალს შორის ნავთობის სწრაფი გადაქაჩვის შესაძლებლობას აძლევს.
პარალელურად, უკრაინულმა დრონებმა როსტოვის ოლქში მდებარე ნავთობბაზა „აგროპროდუქტიც“ დააზიანეს. საზღვართან ახლოს მდებარე ამ ობიექტზე დიდი მოცულობის რეზერვუარები, საავტომობილო და სარკინიგზო ტერმინალები და ნავთობგადამმუშავებელი ქარხანა მდებარეობს.
მნიშვნელოვანია ითქვას, რომ სამხედრო უწყების განცხადებით, მოწინააღმდეგის ნავთობგადამმუშავებელ და ლოგისტიკურ ინფრასტრუქტურაზე მიტანილი დარტყმები რუსეთის ეკონომიკურ პოტენციალს ასუსტებს და ის მომავალშიც გაგრძელდება.