"უკრაინაში Patriot-ის წარმოების საკითხი პოლიტიკურ დონეზე გადაწყვეტილია" - ზელენსკი

უკრაინამ და ამერიკის შეერთებულმა შტატებმა Patriot-ის საზენიტო სისტემების რაკეტების წარმოების ლიცენზირებაზე პოლიტიკურ შეთანხმებას მიაღწიეს. არსებული ინფორმაციით, ამერიკული მხარე უახლოეს დღეებში უკრაინას თავდაცვითი რაკეტების ახალ პარტიას მიაწვდის. ვოლოდიმირ ზელენსკის განცხადებით, ქვეყნის ტექნიკურმა ჯგუფებმა მუშაობა დაუყოვნებლივ დაიწყეს. უკრაინული მხარის განცხადებით, ისინი ადგილობრივი წარმოების პროცესის დაწყებას ლიცენზიების მიღებიდან მალევე გეგმავენ.

საყურადღებოა, რომ Patriot-ებზე შეთანხმების პარალელურად, უკრაინული მხარე ვაშინგტონთან ერთობლივი დრონების წარმოების შესახებაც აწარმოებს მოლაპარაკებებს. მხარეებს შორის ოფიციალური შეთანხმება ჯერ გაფორმებული არ არის, თუმცა აშშ-ის შეიარაღებულმა ძალებმა უკრაინული წარმოების საჰაერო და საზღვაო უპილოტო აპარატები გასატესტად უკვე მიიღო.

Reuters-ის ცნობით, პარალელურად, კიევი ევროპელ მოკავშირეებთან ერთად ახალი ანტისარაკეტო სისტემის შექმნაზეც მუშაობს. საუბარია Patriot-ის ანალოგ საზენიტო სისტემასთან, რომლის წარმოებაც შედარებით იაფი დაჯდება. ამჟამინდელი ცნობებით, ამ საკითხზე მხარეები საფრანგეთში დაგეგმილ შეხვედრაზე უახლოეს მომავალში იმსჯელებენ.

ცნობისთვის, Patriot-ი ამერიკული წარმოების წამყვანი საჰაერო თავდაცვის სისტემაა. მას რუსული ბალისტიკური რაკეტების ეფექტურად განადგურება შეუძლია.