უკრაინის განცხადებით, მოკავშირეებისგან საზენიტო რაკეტების მიწოდება 2025 წელთან შედარებით შემცირდა

პრეზიდენტმა ვოლოდიმირ ზელენსკიმ განაცხადა, რომ 2026 წელს მოკავშირეებმა უკრაინას, 2025 წელთან შედარებით, საჰაერო თავდაცვის რაკეტების მხოლოდ მესამედი მიაწოდეს.

პრეზიდენტმა გააფრთხილა მოკავშირეები, რომ მოსკოვი ზამთრის წინ ბალისტიკური რაკეტების წარმოების მნიშვნელოვნად დაჩქარებას ცდილობს და ცივ პერიოდში ენერგეტიკულ სექტორზე თავდასხმების განახლებას გეგმავს.

უკრაინას ომის დაწყებიდანვე აკლია ამერიკული წარმოების Patriot-ის რაკეტები, რომლებსაც რუსული ბალისტიკური რაკეტების ჩამოგდება შეუძლიათ. თუმცა, ბოლო კვირებში ეს დეფიციტი კიდევ უფრო გამწვავდა, რადგან მხოლოდ ივლისში მოსკოვმა კიევზე დარტყმები საშუალოდ ყოველ სამ დღეში ერთხელ განახორციელა.

"ეს არ არის მხოლოდ საზაფხულო მოვლენა - ეს ტენდენცია 2026 წლის მთელ პირველ ნახევარზე ვრცელდება", - დაწერა ზელენსკიმ Telegram-ზე მიწოდების შემცირების შეფასებისას.

ზელენსკიმ აღნიშნა, რომ დეფიციტი ძირითადად ახლო აღმოსავლეთში მიმდინარე ომმა გამოიწვია. თუმცა, მან არ გამორიცხა, რომ მიწოდების შეფერხება "მიზნად ისახავს უკრაინის იძულებას, რუსეთთან სამშვიდობო მოლაპარაკებებზე კომპრომისზე წავიდეს".

სამხედრო-საჰაერო ძალების განცხადებით, ოთხშაბათის თავდასხმის დროს უკრაინის საჰაერო თავდაცვამ ვერ შეძლო ვერცერთი იმ 24 ბალისტიკური და ოთხი "ცირკონის" (Zircon) ტიპის ფრთოსანი რაკეტის ჩამოგდება, რომლებიც რუსეთმა გამოიყენა.