უკრაინის რადამ პრემიერ მინისტრის და მთავრობის გადადგომას მხარი დაუჭირა

უკრაინის უმაღლესმა რადამ პრემიერ-მინისტრ იულია სვირიდენკოს გადადგომას მხარი დაუჭირა. მასთან ერთად ავტომატურად გადადგა მთელი მთავრობა. სააგენტო "უკრინფორმის" ცნობით, მთავრობის გადადგომას მხარი 258-მა დეპუტატმა დაუჭირა.

"უკრინფორმის" წყაროების ცნობით, პარლამენტში ახალი მთავრობის დანიშვნის თაობაზე კენჭისყრა, სავარაუდოდ, 16 ივლისს გაიმართება.

მანამდე კი მთავრობის მეთაურის მოვალეობას პირველი ვიცე-პრემიერი და ყოფილი პრემიერ-მინისტრი დენის შმიგალი შეასრულებს.

იულია სვირიდენკომ, გადადგომის შესახებ კენჭისყრამდე უმაღლესი რადასადმი მიმართვისას, მადლობა გადაუხადა პარლამენტის წევრებსა და მინისტრთა კაბინეტს ერთობლივი ძალისხმევისთვის, რომელიც ომის დროს უკრაინელებზე ზრუნვას ისახავდა მიზნად.

მან ხაზგასმით აღნიშნა, რომ ენერგეტიკოსების, პედაგოგების, ტრანსპორტის, ჯანდაცვის, საბინაო სექტორისა და იძულებით გადაადგილებული პირების მხარდასაჭერად განხორციელებულ ძალისხმევას საერთო გამარჯვებად მიიჩნევს. მან ასევე ყურადღება გაამახვილა საერთაშორისო ასპარეზზე მუშაობაზე, რამაც შესაძლებელი გახადა ევროკავშირისგან 90 მილიარდი ევროს ოდენობის სესხის მოპოვება და IMF-ის ახალი პროგრამის მიღება.

"ჩვენ ასევე ვზრუნავდით ჩვენს მომავალზე. გასული თვის განმავლობაში, ევროკავშირში გაწევრიანების შესახებ მოლაპარაკებების ექვსი თავიდან ორი გავხსენით. ევროკავშირში გაწევრიანება ჩვენთვის ნათელი და მიღწევადი მიზანია", - განაცხადა სვირიდენკომ.

სვირიდენკოსთან ერთად თანამდებობებს ტოვებენ: პირველი ვიცე-პრემიერი და ენერგეტიკის მინისტრი დენის შმიგალი; ვიცე-პრემიერი აღდგენის საკითხებში და უკრაინის თემებისა და ტერიტორიების განვითარების მინისტრი ოლექსი კულება; ვიცე-პრემიერი ევროპული და ევროატლანტიკური ინტეგრაციის საკითხებში ტარას კაჩკა; ვიცე-პრემიერი ჰუმანიტარული პოლიტიკის საკითხებში და კულტურის მინისტრი ტეტიანა ბერეჟნა; ახალგაზრდობისა და სპორტის მინისტრი მატვი ბიდნი; ვეტერანების საქმეთა მინისტრი ნატალია კალმიკოვა; შინაგან საქმეთა მინისტრი იჰორ კლიმენკო; განათლებისა და მეცნიერების მინისტრი ოქსენ ლისოვი; ჯანდაცვის მინისტრი ვიქტორ ლიაშკო; ფინანსთა მინისტრი სერჰი მარჩენკო; საგარეო საქმეთა მინისტრი ანდრი სიბიჰა; თავდაცვის მინისტრი მიხაილო ფედოროვი; ეკონომიკის, გარემოს დაცვისა და სოფლის მეურნეობის მინისტრი ოლექსი სობოლევი; სოციალური პოლიტიკის, ოჯახისა და ერთიანობის მინისტრი დენის ულიუტინი; იუსტიციის მინისტრის მოვალეობის შემსრულებელი ლუდმილა სუჰაკი; ციფრული ტრანსფორმაციის მინისტრის მოვალეობის შემსრულებელი ოლექსანდრ ბორნიაკოვი.

უმაღლესმა რადამ სვირიდენკოს პრემიერ-მინისტრად დანიშვნას მხარი 2025 წლის 17 ივლისს დაუჭირა. პრეზიდენტმა ვოლოდიმირ ზელენსკიმ კი მისი გადაყენების გადაწყვეტილებასა და "აუცილებელი სამთავრობო ცვლილებების" შესახებ 12 ივლისს გამოაცხადა.

ზელენსკის განცხადებით, მთავრობაში ცვლილებები საჭიროა „განახლებული პოლიტიკური სტრატეგიის განხორციელების უზრუნველსაყოფად“, მაგრამ დამატებითი დეტალები არ დაუკონკრეტებია.

ოპოზიციონერმა დეპუტატმა იაროსლავ ჟელეზნიაკმა განაცხადა, რომ სვირიდენკო, სავარაუდოდ, შეერთებულ შტატებში ელჩის თანამდებობას დაიკავებს.

მოგვიანებით, ზელენსკიმ ქვეყნის პრემიერ-მინისტრის თანამდებობაზე სახელმწიფო კომპანია Naftogaz-ის გენერალური დირექტორი, სერჰი კორეტსკი შეარჩია.