"უმოკლეს ვადაში" "იმედის ბანკის" შექმნის ანონსიდან 5 თვე გავიდა|შევიდა თუ არა ეროვნულ ბანკში განაცხადი?

ტელეკომპანია "იმედის" მფლობელების მხრიდან, "უმოკლეს ვადაში" "იმედის ბანკის" შექმნის დაანონსებიდან 5 თვე გავიდა და BMG დაინტერესდა, შევიდა თუ არა ეროვნულ ბანკში განაცხადი.

"უმოკლეს ვადაში, სულ რამდენიმე თვეში, შევქმნით საკუთარ ბანკს, სახელწოდებით "იმედის ბანკი" - "იმედის" განცხადება

რამდენიმეკვირიანი ლოდინის შემდეგ, ეროვნული ბანკიდან მოგვწერეს, რომ “საბანკო საქმიანობის დაწყების ლიცენზიის მაძიებელთა შესახებ ინფორმაციის გასაჯაროება ხდება მხოლოდ იმ შემთხვევაში, თუკი თავად კონკრეტული სუბიექტის მხრიდან არის ამის მზაობა და თანხმობა”.

სებ-მა, ჯერჯერობით, უპასუხოდ დატოვა BMG-ს დამაზუსტებელი კითხვა - ნიშნავს თუ არა მარეგულირებლის წერილობითი პასუხი იმას, რომ თავად ტელეკომპანიის მფლობელებს არ სურთ ინფორმაციის გასაჯაროება.

რა არის საჭირო საქართველოში ბანკის შესაქმნელად? - ₾50 მლნ საზედამხედველო კაპიტალი...

თუ [იმედის ბანკის] შექმნაზე სრულყოფილი წერილობითი მომართვა შემოვა, განაცხადს განვიხილავთ - სებ

ეროვნული ბანკის პასუხი BMG-ის:

“საქართველოს ეროვნული ბანკის მიერ დანერგილი კომერციული ბანკის ლიცენზირების პრინციპების თანახმად, საბანკო საქმიანობის დაწყების ლიცენზიის მაძიებელთა შესახებ ინფორმაციის გასაჯაროება ხდება მხოლოდ იმ შემთხვევაში, თუკი თავად კონკრეტული სუბიექტის მხრიდან არის ამის მზაობა და თანხმობა.

ამასთან, ეროვნული ბანკის მხრიდან, მსგავსი ინფორმაციის გასაჯაროება წესის მიხედვით ხდება მხოლოდ მას შემდეგ, რაც კონკრეტულ სუბიექტზე გაიცემა საბანკო საქმიანობის დაწყების ლიცენზია”.

შეიტანეს თუ არა სანქცირებული ტელევიზიის მფლობელებმა ეროვნულ ბანკში საბანკო ლიცენზიის მოთხოვნაზე განაცხადი და შესაბამისი დოკუმენტაცია, ამ და სხვა კითხვებზე პასუხის მისაღებად BMG “იმედის” ჰოლდინგის 50%-იან მეწილე ილია მიქელაიშვილთან დაკავშირებას შეეცადა, მაგრამ - უშედეგოდ. ჩვენ ზარებს არც კომპანიის დირექტორმა და 10%-იანმა მეწილემ მარიამ ლომიძემ უპასუხა.

შეგახსენებთ: მიმდინარე წლის 24 თებერვალს, დიდმა ბრიტანეთმა "ტელეიმედი" და "პოსტვ" დაასანქცირა. სანქციების განმარტებაში ნათქვამია, რომ არხების დასანქცირება რუსული დეზინფორმაციის გავრცელებისთვის მოხდა. სანქციები მოიცავს: აქტივების გაყინვას, ტრასტის მომსახურების აკრძალვას და დირექტორის უფლებამოსილების ჩამორთმევის (დისკვალიფიკაციის) სანქციას. მნიშვნელოვანია გარემოება, რომ "ტელეიმედის" მფლობელი 2026 წლის 6 თებერვალს შეიცვალა - ბიზნესმენ ირაკლი რუხაძის ჰოლდინგმა, "ტელეიმედის" მფლობელი კომპანია "ჯორჯიან მედია პროდაქშენ გრუპის" 50%, რომელიც GDS-სა და რადიო იმედსაც მოიცავს, "პრაიმ მედია გლობალზე" გაასხვისა, მეორე 50%-ის მფლობელები კი ტელევიზიის დირექტორთა საბჭოს შემადგენლობაში არსებული პირები - მარიამ ლომიძე (10%); ვასილ კალანდარიშვილი (10%); ირაკლი ჩიხლაძე (10%); ნათია სონღულაშვილი (10%) და მაია ჩიგოშვილი (10%).

დიდი ბრიტანეთის სანქცირებიდან ორ დღეში, 3 დღეში, 27 თებერვალს “იმედმა” განცხადება გაავრცელა, სადაც მფლობელებმა საკუთარი ბანკის შექმნა დაანონსეს. “საზოგადოებას ვაცნობებთ, რომ ჩვენ, „იმედის“ ჰოლდინგის ახალი დამფუძნებლები, ტელეკომპანიის ერთგული მეგობრებისა და სპონსორების ფინანსური მხარდაჭერით, უმოკლეს ვადაში, სულ რამდენიმე თვეში, შევქმნით საკუთარ ბანკს, სახელწოდებით "იმედის ბანკი“, - ეწერა განცხადებაში.