უნგრეთის პარლამენტი პრეზიდენტის გადაყენებისთვის ემზადება

უნგრეთის პარლამენტი პრემიერ-მინისტრ პეტერ მადიარის მიერ ინიციირებული იმ საკონსტიტუციო ცვლილებების დამტკიცებისთვის ემზადება, რომელიც მიზნად პრეზიდენტ ტამაშ შულიოკის თანამდებობიდან გადაყენებას ისახავს.

ქვეყნის ახალი ლიდერი პრეზიდენტს ყოფილი პრემიერის, ვიქტორ ორბანის "მარიონეტს" უწოდებს და აცხადებს, რომ მისი პოლიტიკური მემკვიდრეობის დემონტაჟს განახორციელებს.

მადიარის თქმით, მმართველმა პარტია Tisza-მ სისტემური ცვლილებებისთვის საპარლამენტო არჩევნებში ამომრჩევლებისგან მკაფიო მანდატი უკვე მიიღო და “ახლა მათი ვალია, ეს დაკვეთა შეასრულონ”.

Tisza-ს მიერ ინიციირებული დოკუმენტი პრეზიდენტის ინსტიტუტის მიმართ საზოგადოების ნდობის დაკარგვის არგუმენტს ეყრდნობა და მიზნად საკონსტიტუციო დემოკრატიის აღდგენისთვის აუცილებელი წინაპირობების შექმნას ისახავს. პარლამენტის მიერ კანონპროექტის დამტკიცების შემთხვევაში, პრეზიდენტის უფლებამოსილება დაუყოვნებლივ შეწყდება. პრემიერის განმარტებით, თუ შულიოკი კანონს ხუთი დღის ვადაში არ მოაწერს ხელს, მის წინააღმდეგ იმპიჩმენტის პროცედურა დაიწყება. ახალი კონსტიტუციის ამოქმედებამდე, ან მაქსიმუმ ხუთი წლის ვადით, პარლამენტი ახალ პრეზიდენტს აირჩევს.

ტამაშ შულიოკი უკვე გამოეხმაურა მმართველი გუნდის მიერ ინიციირებულ კანონპროექტს და განაცხადა, რომ ის ვიქტორ ორბანის პოლიტიკური დღის წესრიგით არ ცხოვრობს, შესაბამისად, მიუკერძოებელი და ნეიტრალურია და არ შეიძლება მისი გადაყენება. საყურადღებოა, რომ გასულ კვირას ყოფილი პრემიერის, ვიქტორ ორბანის პარტია Fidesz-მა შულიოკის მხარდასაჭერად საპროტესტო აქცია გამართა.

შეგახსენებთ, რომ ტამაშ შულიოკი პარლამენტმა პრეზიდენტად 2024 წელს აირჩია, მანამდე კი ის საკონსტიტუციო სასამართლოს მოსამართლედ 10 წლის განმავლობაში მუშაობდა.