უზბეკეთის საინვესტიციო ფონდმა ლონდონის ბირჟაზე $604-მილიონიანი IPO განახორციელა

უზბეკეთის ეროვნულმა საინვესტიციო ფონდმა ლონდონისა და ტაშკენტის საფონდო ბირჟებზე აქციების საჯარო განთავსების პროცესი წარმატებით დაასრულა. ეს არის ქვეყნის ისტორიაში პირველი საერთაშორისო დებიუტი კაპიტალის ბაზარზე, რომლის ფარგლებშიც ფონდმა $604 მილიონი მოიზიდა.

აღნიშნული ტრანზაქცია ლონდონის საფონდო ბირჟისთვის 2026 წლის ერთ-ერთი პირველი მსხვილი IPO-ა, რომელმაც უზბეკეთის სახელმწიფო ფონდის მთლიანი ღირებულება $1.95 მილიარდად განსაზღვრა.

როგორც ირკვევა, ქვეყნის ეკონომიკისა და ფინანსთა სამინისტრომ ფონდის 31%-იანი წილი გაყიდეს. ლონდონში ვაჭრობის გახსნისას ერთი აქციის ფასმა $26 შეადგინა, რაც სამინისტროს მიერ დადგენილ ფიქსირებულ ფასს $1-ით აღემატებოდა.

IPO-ს შედეგად, პროექტის მთავარი ინვესტორები ისეთი გლობალური ორგანიზაციები გახდნენ, როგორებიცაა: Blackrock, Franklin Resources, Red Wheel და Allan & Gill Gray Foundation. მათ ჯამში $300 მილიონის ღირებულების აქციები შეისყიდეს.

ცნობისთვის, ფონდი უზბეკეთის 13 სახელმწიფო კომპანიაში 25%-დან 40%-მდე წილებს ფლობს, რაც კომუნალურ და ტელეკომუნიკაციების სექტორებს მოიცავს. არსებული ინფორმაციით, ფონდის პორტფელში შემავალი უმსხვილესი აქტივი, Uzbekistan Airways-ი, უახლოეს წლებში საკუთარი IPO-ს განსახორციელებლად ემზადება. ამასთან, მიმდინარე წელს ლონდონში აქციების განთავსებას გეგმავს ქვეყნის ეროვნული სამთო-მეტალურგიული საწარმო Navoi Mining & Metallurgical Company.

მნიშვნელოვანია ითქვას, რომ აღნიშნული ნაბიჯი უზბეკეთის საბაზრო ეკონომიკაზე გადასვლის ფართომასშტაბიანი გეგმის ნაწილია. ქვეყნის პრეზიდენტის გასული წლის განკარგულებით, საჯარო ბაზარზე გასასვლელად ემზადებიან სხვა სახელმწიფო კომპანიებიც, მათ შორის ელექტრონული კომერციის პლატფორმა Uzum-ი და ლოგისტიკური კომპანია Centrum-ი.