"ვაგრძელებთ კომუნიკაციას აშშ-სთან, შედეგი უნდა იყოს სტრატეგიული პარტნიორობის განახლება" - კობახიძე

"ჩვენ ვაგრძელებთ კომუნიკაციას აღმასრულებელ ხელისუფლებასთან, პრეზიდენტ ტრამპის ადმინისტრაციასთან, სახელმწიფო დეპარტამენტთან, გვაქვს კონკრეტული საუბრები და გვაქვს იმედი, რომ ეს საუბრები მოიტანს შედეგს", - ამის შესახებ ირაკლი კობახიძემ დღევანდელ ბრიფინგზე განაცხადა.

"ოცნების" მთავრობის პრემიერ მინისტრის თქმით, კომუნიკაციის შედეგი აშშ-სთან სტრატეგიული პარტნიორობის განახლება უნდა იყოს, რომელიც საქართველოს 2024 წელს შეუჩერდა.

კობახიძემ აშშ-სთან ურთიერთობების განახლებაზე გასულ კვირას სენატში რესპუბლიკელი კონგრესმენი ჯო უილსონისა და სახელმწიფო მდივანი მარკო რუბიოს დიალოგის კონტექსტში ისაუბრა.

"ჩვენ ვინარჩუნებთ ოპტიმიზმს იმასთან დაკავშირებით, რომ სტრატეგიული პარტნიორობა საქართველოსა და აშშ-ს შორის განახლდება. ჯო უილსონი არის არასერიოზული კაცი. ჯო უილსონზე მე დროს საერთოდ არ დავხარჯავდი. ჯო უილსონი არის არასერიოზული კაცი, რომელიც საქართველოს უწოდებს პროირანულს, პროჩინურს, პრორუსულს ხომ ადრე იძახდა და ახლა პროირანული გავხდით, შეიძლება, ასეთი კაცი სერიოზულად მიიჩნიოს ვინმემ? რომელიც გამოდის და საქართველოს უწოდებს პროირანულ ქვეყანას. არასერიოზული კაცია. კაცი, რომელიც გამოდის და ამბობს, რომ საქართველოს ხელისუფლება არის პროირანული, რამდენად არასერიოზულია, ხომ ხედავთ. ასეთი არასერიოზული განცხადების გამკეთებელი კაცი როგორ შეიძლება, ვინმემ სერიოზულად მიიჩნიოს. ხვალ გამოვა და იტყვის, რომ პროკამბოჯური ხელისუფლება ვართ. საოცრებაა. ასეთი არასერიოზული მე არაფერი მინახავს და თქვენ შეგიძლიათ, ხშირად იმეოროთ ჯო უილსონის არასერიოზული ციტატები", - განაცხადა ირაკლი კობახიძემ.

ცნობისთვის, 3 ივნისს სენატში გამართულ სხდომაზე ჯო უილსონმა აღნიშნა, რომ საქართველო ირანს სანქციებისთვის გვერდის ავლაში ეხმარება და "ქართული ოცნება" არჩევნების გაყალბების გამო არალეგიტიმური მთავრობაა. მის შეფასებას აშშ-ის სახელმწიფო მდივანი მარკო რუბიოც დაეთანხმა და აღნიშნა, რომ ადმინისტრაცია საქართველოსგან ტრაექტორიის ცვლილებას იმედოვნებს. რუბიოსვე თქმით, "ოცნებამ" აშშ-ს ჰკითხა, თუ რა იქნება საჭირო ურთიერთობების გამოსასწორებლად - ამ ცნობას "ქართული ოცნების" ლიდერები უარყოფენ.