ვაკანსიები, მილოცვები, სამძიმარი|როგორ იყენებს ციფრულ არხებს სახელმწიფო ქონების სააგენტო პრივატიზაციისთვის?
ეკონომიკისა და მდგრადი განვითარების სამინისტროს სახელმწიფო ქონების ეროვნული სააგენტო პრივატიზაციის წლიური თუ კვარტალური გეგმების შესრულებით თავს იწონებს, მაგრამ გასხვისებული სახელმწიფო აქტივების შესახებ საჯარო ინფორმაციის გაცემაზე უარს აცხადებს.
მიმდინარე წელს BMG-მ უწყებიდან, რომელსაც 2024 წლის ზაფხულიდან ირაკლი შენგელია ხელმძღვანელობს, საჯარო ინფორმაცია 2-ჯერ გამოითხოვა.
ქონების სააგენტოს პირველი უარი საჯარო ინფორმაციის გაცემაზე
პირველი მიმართვა ქონების ეროვნულ სააგენტოში 10 თებერვალს შევიდა. BMG ითხოვდა ინფორმაციას პირდაპირი მიყიდვის ფორმით პრივატიზებული ყველაზე ძვირად ღირებული (TOP-10) ქონების შესახებ. კერძოდ, ბიზნესმედიას აინტერესებდა: საპრივატიზაციო ფასი; ახალი მფლობელების ვინაობა და საინვესტიციო ვალდებულებები.
აღნიშნულით იმიტომაც დავინტერესდით, რომ შარშან პრემიერმა ირაკლი კობახიძემ პირდაპირი მიყიდვის ფორმით პრივატიზებას უარის თქმა დააანონსა, თუმცა რამდენიმე თვეში გამონაკლისები დაუშვეს.
ასევე, BMG-ის კითხვები ეხებოდა სიმბოლურ 1 ლარად გადაცემულ ქონებას და სააგენტოს ბიუჯეტის მკვეთრ შემცირებას - წელს უწყების დაფინანსება 128 მილიონიდან 30 მილიონ ლარამდე ჩამოვიდა. აღნიშნულ მოთხოვნაზე სააგენტოსგან პასუხი საერთოდ არ მოსულა - სსიპს არც ინფორმაცია გაუცია და არც საჯარო ინფორმაციის გაცემაზე უარის მიზეზი განუმარტავს.
მეორე უარი ქონების სააგენტოდან|გადამისამართება საძიებო სისტემებზე
მეორედ BMG-მ ქონების სააგენტოს 2 აპრილს მიმართა. 6 კითხვიდან პასუხი მხოლოდ ერთზე (ისიც ნაწილობრივ) მიიღო. სრულყოფილი ინფორმაციის ნაცვლად, ოფიციალურ წერილში უწყებამ გამოცემას მიუთითა, რომ პრივატიზებული ქონების შესახებ მონაცემები თავად ეძებონ სააუქციონო პორტალსა (eauction.ge) და მთავრობის განკარგულებებში.