ვინარჩუნებთ ოპტიმისტურ მოლოდინს, რომ მოხერხდება სტრატეგიული პარტნიორობის აღდგენა - კობახიძე აშშ-ზე

ირაკლი კობახიძის განცხადებით, ხელისუფლება ინარჩუნებს ოპტიმისტურ მოლოდინს, რომ საქართველოსა და ამერიკის შეერთებულ შტატებს შორის სტრატეგიული პარტნიორობის აღდგენა მოხერხდება.

როგორც მან ჟურნალისტებთან საუბრისას აღნიშნა, ამერიკელ პარტნიორებთან კომუნიკაცია გრძელდება.

„ვინარჩუნებთ ოპტიმისტურ მოლოდინს იმასთან დაკავშირებით, რომ მოხერხდება სტრატეგიული პარტნიორობის აღდგენა საქართველოსა და აშშ-ს შორის. ჩვენ გვაქვს კომუნიკაცია ამერიკელ პარტნიორებთან. იმედია, რომ ჩვენ ვიხილავთ შემხვედრ ნაბიჯებს, რაც საბოლოო ჯამში უზრუნველყოფს სტრატეგიული პარტნირობის აღდგენას. ეს არის ჩვენი ამოცანა და მოთმინებით ველოდებით ამერიკული მხარის შემხვედრ ნაბიჯებს“, - განაცხადა ირაკლი კობახიძემ.

შეერთებულმა შტატებმა საქართველოსთან სტრატეგიული პარტნიორობა 2024 წლის 30 ნოემბერს შეაჩერა. გადაწყვეტილებას წინ უძღოდა „ქართული ოცნების“ განცხადება იმის შესახებ, რომ მან ევროკავშირში გაწევრიანების საკითხის დღის წესრიგიდან ამოღება გადაწყვიტა.

სტრატეგიული პარტნიორობა, რომელიც აშშ-საქართველოს სტრატეგიული პარტნიორობის ქარტიაშია ასახული, 2009 წლის 9 იანვარს გაფორმდა. სტრატეგიული პარტნიორობის კომისიის პირველ შეხვედრაზე, რომელიც 2009 წლის ივნისში გაიმართა, ოთხი ორმხრივი სამუშაო ჯგუფი ჩამოყალიბდა ქარტიაში განსაზღვრულ პრიორიტეტულ სფეროებზე სამუშაოდ. ეს სფეროებია:

• დემოკრატია; • თავდაცვა და უსაფრთხოება; • ეკონომიკური, სავაჭრო და ენერგეტიკული საკითხები; • ხალხთა შორის და კულტურული გაცვლა.