Visa-მ ბანკებისთვის სტეიბლკოინების პლატფორმა წარადგინა

გადახდების სისტემების ამერიკულმა გიგანტმა, Visa-მ ბანკებისა და ფინტექ-კომპანიებისთვის სტეიბლკოინებით ოპერაციების განსახორციელებლად ახალი პლატფორმა, Visa Stablecoin Platform-ი (VSP) წარადგინა.

როგორც ირკვევა, VSP სისტემა ერთიან სივრცეში აქტივების გამოშვების, განაღდების, შენახვისა და გადარიცხვის პროცესებს სრულად უზრუნველყოფს. ახალი პროდუქტი Wallet-as-a-Service-ის მომსახურებასაც მოიცავს, რომლის ფარგლებშიც Visa საფულის ინფრასტრუქტურას თავად განათავსებს და მართავს, კლიენტები კი სისტემას სპეციალური API-ით დაუკავშირდებიან.

პლატფორმაზე წვდომა უსაფრთხოების გასაღებებით არის დაცული, გადარიცხვების უსაფრთხოებას კი ავტორიზებული მისამართების ე.წ. თეთრი სია უზრუნველყოფს, რადგან ნებისმიერი სენსიტიური ოპერაცია მეორე მომხმარებლის მიერ დადასტურებას აუცილებლად საჭიროებს.

კომპანიის პროდუქტებისა და სტრატეგიის ხელმძღვანელის, ჯეკ ფორესტელის შეფასებით, ეს ინიციატივა მსხვილი ორგანიზაციებისთვის მთავარ ბარიერს, სტეიბლკოინების ოპერაციულ იმპლემენტაციას სრულად აღმოფხვრის.

მნიშვნელოვანია ითქვას, რომ საწყის ეტაპზე VSP მუშაობას კონსორციუმ Open Standard-ის სტეიბლკოინ Open USD-ით დაიწყებს, რომლის წევრიც თავად Visa-ც არის. დასახელებულ ტოკენს გამოშვებისა თუ განაღდების საკომისიო არ აქვს, რეზერვებიდან მიღებულ შემოსავალს კი პარტნიორები სრულად მიიღებენ.