Wizz Air-ი ქუთაისიდან ლიონის მიმართულებით ფრენებს აჩერებს|განცხადება
ავიაკომპანია Wizz Air-ი ქუთაისი–ლიონის მიმართულებით ფრენებს დროებით აჩერებს. კომპანიის ინფორმაციით, აღნიშნული მიმართულებით რეისები 2026 წლის 22 ოქტომბრიდან შეწყდება.
როგორც ავიაკომპანიის მიერ BM.GE-სთვის მოწოდებულ განცხადებაშია ნათქვამი, გადაწყვეტილება მარშრუტების რეგულარული ოპტიმიზაციის ფარგლებში იქნა მიღებული.
"ავიაკომპანია მუდმივად აკვირდება თავისი მარშრუტების შედეგებს, რათა დარწმუნდეს, რომ მისი ქსელი მაქსიმალურად პასუხობს მგზავრების მოთხოვნას და ყველაზე პოპულარულ მიმართულებებზე მომხმარებლებს ყველაზე კონკურენტულ ტარიფებს სთავაზობს. სტანდარტული პრაქტიკის ფარგლებში, ავიაკომპანია ამ შეფასებების შედეგებზე დაყრდნობით რეგულარულად ახდენს საკუთარი მარშრუტების ქსელის ოპტიმიზაციას", - განმარტავენ Wizz Air-ში.
რაც შეეხება იმ მგზავრებს, რომლებსაც ბილეთები უკვე შეძენილი აქვთ, კომპანიაში აცხადებენ, რომ მათ ელექტრონული შეტყობინების სახით შესაბამისი ალტერნატივები უკვე მიიღეს.
მომხმარებლებს, რომლებმაც ბილეთები უშუალოდ wizzair.com-ზე ან კომპანიის მობილური აპლიკაციით შეიძინეს, შემდეგი ვარიანტები ეძლევათ:
• ალტერნატიული სამოგზაურო გადაწყვეტილებები; • თანხის სრული დაბრუნება გადახდის თავდაპირველი მეთოდით; • თანხის დაბრუნება WIZZ კრედიტის სახით.
Wizz Air-ის განცხადებით, კომპანია მომავალშიც გააგრძელებს ბაზარზე არსებული შესაძლებლობებისა და პოტენციური მოთხოვნის შეფასებას მგზავრებისთვის საუკეთესო მომსახურების შესათავაზებლად.