"ყველა უნივერსიტეტს მიეწოდება ის დაფინანსება, რაც მათ სჭირდებათ" - განათლების მინისტრის მოადგილე

"ყველა უნივერსიტეტს მიეწოდება ის დაფინანსება, რაც მათ სჭირდებათ" - ასე პასუხობს განათლების მინისტრის მოადგილე ზვიად გაბისონია BMG-ს კითხვას, სტუდენტების კვოტების შემცირების შემდეგ უნივერსიტეტებისთვის შემცირებული შემოსავლების კომპენსირებაზე.

როგორც ზვიად გაბისონიამ აღნიშნა, ყველა საჯარო უნივერსიტეტი, სადაც სწავლა 2026-2027 სასწავლო წლიდან სრულიად უფასო იქნება, ბიუჯეტიდან დაფინანსდება.

"ეს საკითხი საკმაოდ მარტივია. მოგეხსენებათ, რომ 2026 წლის პირველი სექტემბრიდან გადავდივართ სრული დაფინანსების მოდელზე. შესაბამისად, დაფინანსების მოდელის ნაწილიც მზად არის და უახლოეს პერიოდში, მთავრობის შესაბამისი პროცედურების დაცვით გამოქვეყნდება. თუმცა, მიუხედავად ამისა, ჩვენ მიგვაჩნია (ძალიან ნათლად ვამბობთ ამას), რომ იმის გამო, რომ სწავლება იქნება სრულიად უფასო, ამ მიმართულებით ყველა უნივერსიტეტს მიეწოდება ის დაფინანსება, რაც მათ სჭირდებათ სწავლის განსახორციელებლად, რა თქმა უნდა, ბიუჯეტიდან", - განაცხადა ზვიად გაბისონიამ.

შეგახსენებთ, რომ "ქართული ოცნების" უმაღლესი განათლების რეფორმის ფარგლებში, ილიას სახელმწიფო უნივერსიტეტში მისაღები სტუდენტების კვოტა დაახლოებით 14-ჯერ შემცირდა. უნივერსიტეტი წელს საბაკალავრო პროგრამებზე მხოლოდ 300 სტუდენტს მიიღებს, მაშინ როცა გასულ წელს ილიაუნის კვოტა 4207 იყო.

მისაღები სტუდენტების კვოტები სხვა უნივერსიტეტებსაც შეუმცირდათ; პარალელურად, ყველაზე მეტი კვოტა თბილისის სახელმწიფო უნივერსიტეტს ერგო - 6650 მისაღები ადგილით (გასულ წელს - 6928 ჰქონდა), ტექნიკურ უნივერსიტეტს კი - 3880 ადგილი (გასულ წელს 4166 ჰქონდა).