ყველაფერი ირაკლი ღარიბაშვილის ახალი ბრალის - ქრთამის აღების საქმის შესახებ

საქართველოს პროკურატურამ ყოფილ პრემიერ-მინისტრ ირაკლი ღარიბაშვილს განსაკუთრებით დიდი ოდენობით ქრთამის, წინასწარი შეთანხმებით ჯგუფის მიერ აღების ფაქტზე ახალი ბრალდება წარუდგინა. უწყების განცხადებით, საქმე თავდაცვის სამინისტროს მიერ განხორციელებულ საიდუმლო სახელმწიფო შესყიდვებს და ამ პროცესის შედეგად ირაკლი ღარიბაშვილისთვის 750 000 ლარის ქრთამის გადაცემას ეხება.

პროკურატურის ვერსიით, ქრთამის თანხა ყოფილ პრემიერ-მინისტრამდე მაშინდელი თავდაცვის მინისტრის, ჯუანშერ ბურჭულაძის გავლით მივიდა. გამოძიების თანახმად, თავდაცვის სამინისტროს სამედიცინო აპარატურისა და ინვენტარის შესყიდვებისას კონკურენტული გარემო ხელოვნურად შეიზღუდა, რამაც სახელმწიფოსთვის საქონლის რეალურ ღირებულებაზე მნიშვნელოვნად მაღალი ფასის გადახდა გამოიწვია.

ამჟამად ირაკლი ღარიბაშვილი სხვა სისხლის სამართლის საქმეზე სასამართლოს მიერ დამტკიცებული საპროცესო შეთანხმების საფუძველზე 5-წლიან სასჯელს იხდის. ახალი ბრალდება კი, პროკურატურის მიერ მითითებული კვალიფიკაციით, 11-დან 15 წლამდე თავისუფლების აღკვეთას ითვალისწინებს.

როგორ დაიწყო ახალი გამოძიება

გენერალური პროკურორის მოადგილის, ამირან გულუაშვილის განცხადებით, გამოძიებისთვის მნიშვნელოვანი ინფორმაცია 2026 წლის 12 აგვისტოს გახდა ხელმისაწვდომი. მისი თქმით, პროკურატურას გამოძიებასთან თანამშრომლობის სურვილით მიმართა ვასილ მხეიძემ, რომელიც საქართველოს ყოფილი თავდაცვის მინისტრის ნათესავია და ამ საქმესთან დაკავშირებული სხვა ეპიზოდების გამო მსჯავრდებულია.

გულუაშვილის განცხადებით, მხეიძემ გამოძიებას მის ხელთ არსებული ინფორმაცია მიაწოდა, რის შემდეგაც შესაბამისი საგამოძიებო მოქმედებები ჩატარდა. მისივე თქმით, გამოძიებას ასევე ითანამშრომლა ყოფილმა თავდაცვის მინისტრმა ჯუანშერ ბურჭულაძემ.

პროკურატურის ვერსიით, სწორედ ამ მასალების, მათ შორის დაკითხვის შედეგად მიღებული ინფორმაციისა და სხვა საგამოძიებო-საპროცესო მოქმედებების საფუძველზე დადგინდა ირაკლი ღარიბაშვილის სავარაუდო მონაწილეობა დანაშაულში.

რას ედავება პროკურატურა ირაკლი ღარიბაშვილს

პროკურატურის განცხადებით, სავარაუდო დანაშაულებრივი სქემა 2021-2024 წლებში, იმ პერიოდში მოქმედებდა, როდესაც ირაკლი ღარიბაშვილი საქართველოს პრემიერ-მინისტრის თანამდებობას იკავებდა.

ამირან გულუაშვილის თქმით, ამ პერიოდში ღარიბაშვილი, როგორც პრემიერ-მინისტრი, განსაზღვრავდა მთავრობის საქმიანობის ძირითად მიმართულებებს, ორგანიზებას უწევდა მთავრობის საქმიანობას და კოორდინაციასა და კონტროლს უწევდა მინისტრების საქმიანობას.

პროკურატურის განცხადებაში აღნიშნულია:

„სახელმწიფო უსაფრთხოების სამსახურის მიერ ჩატარებული შემხვედრი საგამოძიებო-საპროცესო მოქმედებების შედეგად დადგინდა, რომ 2021-2024 წლებში, ირაკლი ღარიბაშვილი იკავებდა რა პრემიერ-მინისტრის თანამდებობას, წარმოადგენდა სახელმწიფო-პოლიტიკურ თანამდებობის მქონე პირს. კანონმდებლობის შესაბამისად, სხვა ფუნქციებთან ერთად იგი განსაზღვრავდა მთავრობის საქმიანობის ძირითად მიმართულებებსა და ორგანიზებას უწევდა მთავრობის საქმიანობას, ასევე ახორციელებდა მინისტრების საქმიანობის კოორდინაციასა და კონტროლს.“

ამავე პერიოდში თავდაცვის მინისტრი ჯუანშერ ბურჭულაძე იყო. პროკურატურის განცხადებით, ბურჭულაძე, როგორც მინისტრი, პრემიერ-მინისტრის წინაშე იყო ანგარიშვალდებული და სამინისტროს შესაბამისი სტრუქტურებისა და თანამდებობის პირების საქმიანობას ზედამხედველობდა.

რა შესყიდვებზეა საუბარი?

გამოძიების მიხედვით, 2022 წლის ბოლოდან თავდაცვის სამინისტროს სხვადასხვა ძვირადღირებული სამედიცინო აპარატურისა და ინვენტარის შეძენის საჭიროება გაუჩნდა. პროკურატურის თანახმად, შესყიდვები საიდუმლო პროცედურით უნდა განხორციელებულიყო.

უწყების ვერსიით, ჯუანშერ ბურჭულაძესთან შეთანხმებით, მისმა ნათესავმა ვასილ მხეიძემ შესაბამისი გამოცდილების მქონე ბიზნესმენს მიმართა. პროკურატურის განცხადებით, მას შესთავაზეს ისეთი პირობების შექმნა, რომელიც დაკავშირებული კომპანიის გამარჯვებასა და მისთვის სასურველი ფასის უზრუნველყოფას უზრუნველყოფდა.

სანაცვლოდ, გამოძიების თანახმად, ბიზნესმენისგან სახელშეკრულებო ღირებულების დაახლოებით 10%-ის ნაღდი ფულის სახით გადაცემას ითხოვდნენ.

პროკურატურა ამ ეპიზოდს ასე აღწერს:

„2022 წლის ბოლოდან, საქართველოს თავდაცვის სამინისტროს წარმოეშვა სხვადასხვა ძვირადღირებული სამედიცინო აპარატურისა და ინვენტარის შეძენის საჭიროება, რაც უნდა განხორციელებულიყო საიდუმლო შესყიდვის გზით. აღნიშნულ პროცედურებში მონაწილეობის მიზნითა და არამართლზომიერი ფინანსური სარგებლის მისაღებად, ჯუანშერ ბურჭულაძესთან შეთანხმებით, მისი ნათესავი - ვასილ მხეიძე დაუკავშირდა შესაბამისი გამოცდილების მქონე ნაცნობ ბიზნესმენს, რომელსაც შესთავაზა შესყიდვის იმგვარი ფორმით გამოცხადება, რაც გარანტირებულად უზრუნველყოფდა სასურველი ფასით ამ უკანასკნელთან დაკავშირებული კომპანიის გამარჯვებას, სანაცვლოდ კი მოითხოვა მთლიანი სახელშეკრულებო ღირებულების 10%-ის ნაღდი ფულის სახით მისთვის გადაცემა.“

პროკურატურის ინფორმაციით, ბიზნესმენმა თავდაპირველად დანაშაულებრივ შეთანხმებაში მონაწილეობაზე უარი თქვა და უმაღლესი თანამდებობის პირების მხრიდან დამატებითი გარანტიების მიღება მოითხოვა.

გამოძიების ვერსიით, სწორედ ამის შემდეგ ჩაერთო საქმეში ირაკლი ღარიბაშვილი.

„მას შემდეგ, რაც ვასილ მხეიძესთან დაკავშირებულმა პირმა საწყის ეტაპზე თავი შეიკავა დანაშაულებრივი შეთანხმებისაგან და მოითხოვა მეტი გარანტიები უმაღლესი თანამდებობის მქონე პირებისგან, იმჟამინდელი თავდაცვის მინისტრი ჯუანშერ ბურჭულაძე, როგორც ანგარიშვალდებული პირი შეუთანხმდა იმჟამინდელ საქართველოს პრემიერ-მინისტრს ირაკლი ღარიბაშვილს მასზედ, რომ თავდაცვის სამინისტროს საჭიროებებისათვის შესყიდვებს განახორციელებდა იმგვარი ფორმით, რაც უზრუნველყოფდა ზემოხსენებულ მეწარმესთან დაკავშირებული კომპანიების გარანტირებულად, სასურველი ფასით გამარჯვებას, სანაცვლოდ კი მიიღებდნენ სოლიდურ არამართლზომიერ ფინანსურ სარგებელს.“

პროკურატურის განცხადებით, ღარიბაშვილისგან სავარაუდო „სამსახურებრივი მფარველობის“ მიღების შემდეგ, შესყიდვების პროცესში ჩართულმა სხვა თანამდებობის პირებმა შესაბამისი გადაწყვეტილებები მიიღეს.

უწყება მიუთითებს მაშინდელ თავდაცვის მინისტრის მოადგილე გიორგი ხაინდრავასა და შესყიდვების დეპარტამენტის ყოფილ ხელმძღვანელ ვლადიმერ ღუდუშაურზე.

„მიიღო რა სრული სამსახურებრივი მფარველობა ირაკლი ღარიბაშვილისგან, რომელმაც თავის მხრივ მოითხოვა შესაბამისი მატერიალური სარგებლის მისთვისაც გადაცემა და დაუდასტურა შერჩეული ბიზნესმენის სანდოობა მსგავს საკითხებში, ჯუანშერ ბურჭულაძის დავალებით, საქართველოს თავდაცვის მინისტრის იმჟამინდელმა მოადგილემ - გიორგი ხაინდრავამ და შესყიდვების დეპარტამენტის იმჟამინდელმა უფროსმა - ვლადიმერ ღუდუშაურმა, სამინისტროს მიერ სსიპ „გიორგი აბრამიშვილის სახელობის საქართველოს თავდაცვის სამინისტროს სამხედრო ჰოსპიტალისთვის“ სხვადასხვა სამედიცინო აპარატურისა და ინვენტარის შეძენის პროცესში მიზანმიმართული ქმედებებით შექმნეს არაკონკურენტული გარემო.“

რამდენი გადაიხადა სახელმწიფომ შესყიდვაში?

პროკურატურის ინფორმაციით, საუბარია სამ საიდუმლო შესყიდვაზე. გამოძიების თანახმად, ამ შესყიდვების ფარგლებში დაკავშირებულმა კომპანიებმა თავდაცვის სამინისტროს მიაწოდეს ისეთი სამედიცინო აპარატურა და სხვა ინვენტარი, რომლის რეალური ღირებულებაც 11 499 705 ლარს შეადგენდა, თუმცა სახელმწიფო შესყიდვების ხელშეკრულებებით ამ საქონლისა და მომსახურების ღირებულებამ 18 484 960 ლარი შეადგინა.

სხვაობა, პროკურატურის შეფასებით, სახელმწიფოსთვის მიყენებულ ზიანს წარმოადგენს.

„შედეგად, 3 საიდუმლო შესყიდვის დროს, ზემოხსენებულ პირებთან დაკავშირებულმა კომპანიებმა, საქართველოს თავდაცვის სამინისტროს 11 499 705 ლარის რეალური ღირებულების მქონე სამედიცინო აპარატურა და სხვა ინვენტარი მიაწოდეს 18 484 960 ლარად.“

პროკურატურის განცხადებით, აღნიშნული სქემის შედეგად სახელმწიფოს მიადგა 6 985 255 ლარის ქონებრივი ზიანი და არსებითად დაირღვა საჯარო ინტერესი.

როგორ გადანაწილდა ქრთამის სახით აღებული ₾1.9 მილიონი?

გამოძიების თანახმად, ბიზნესმენმა შესყიდვებთან დაკავშირებული გარანტიებისა და მფარველობის სანაცვლოდ ვასილ მხეიძეს რამდენიმე ეტაპად ნაღდი ფულის სახით დაახლოებით 1.9 მილიონი ლარი გადასცა.

პროკურატურის ინფორმაციით, ეს თანხა სამი შესყიდვის მთლიანი სახელშეკრულებო ღირებულებების დაახლოებით 10%-ს შეადგენდა.

უწყების ვერსიით, მხეიძემ 1.9 მილიონი ლარიდან 400 000 ლარი თავად დაიტოვა, ხოლო 1.5 მილიონი ლარი ჯუანშერ ბურჭულაძეს გადასცა.

შემდეგ, პროკურატურის თანახმად, ბურჭულაძემ მიღებული თანხა ორ ნაწილად გაიყო — 750 000 ლარი თავად დაიტოვა, ხოლო დარჩენილი 750 000 ლარი რამდენიმე ეტაპად ირაკლი ღარიბაშვილს გადასცა.

„შესაბამისი გარანტიებისა და მფარველობის სანაცვლოდ, შესყიდვებში მონაწილე ბიზნესმენმა რამდენიმე ეტაპად ვასილ მხეიძეს ნაღდი ფულის სახით გადასცა მთლიანი სახელშეკრულებო ღირებულებების დაახლოებით 10% - 1 900 000 ლარი, საიდანაც ამ უკანასკნელმა პირადი სარგელის სახით დაიტოვა 400 000 ლარი, ხოლო დარჩენილი თანხა სრულად გადასცა ჯუანშერ ბურჭულაძეს. ამ უკანასკნელმა ქრთამის სახით მიღებული 1 500 000 ლარიდან, 750 000 ლარი დაიტოვა თავად, ხოლო თანხის მეორე ნახევარი - 750 000 ლარი რამდენიმე ეტაპად ასევე ქრთამის სახით ხელზე გადასცა ირაკლი ღარიბაშვილს.“

რა მუხლით წაუყენეს ირაკლი ღარიბაშვილს ბრალი?

საქართველოს პროკურატურამ ირაკლი ღარიბაშვილს ბრალდება სისხლის სამართლის კოდექსის 338-ე მუხლის მეორე ნაწილის „ა“ და „გ“ ქვეპუნქტებითა და მესამე ნაწილის „ე“ ქვეპუნქტით წარუდგინა.

პროკურატურის განმარტებით, ეს კვალიფიკაცია გულისხმობს სახელმწიფო-პოლიტიკური თანამდებობის მქონე პირის მიერ, ჯგუფურად, განსაკუთრებით დიდი ოდენობით ქრთამის აღებას.

აღნიშნული მუხლით გათვალისწინებული სასჯელი 11-დან 15 წლამდე თავისუფლების აღკვეთაა.

ამასთან, პროკურატურის განცხადებით, საქმეში ფიგურანტი სხვა საჯარო მოხელეები აღნიშნულ ფაქტებთან დაკავშირებით უკვე არიან მსჯავრდებულები.

მათ შორის, ჯუანშერ ბურჭულაძეს სასამართლომ 10 წლით თავისუფლების აღკვეთა მიუსაჯა.

ამირან გულუაშვილის განცხადებით, ვინაიდან ირაკლი ღარიბაშვილი ამჟამად სხვა სისხლის სამართლის საქმეზე გამოტანილი გამამტყუნებელი განაჩენის საფუძველზე სასჯელს იხდის, პროკურატურა მის ახალ საქმეზე სასამართლოს მხოლოდ წინასასამართლო სხდომის განსაზღვრის თაობაზე მიმართავს.

„საქართველოს პროკურატურა ირაკლი ღარიბაშვილის ბრალდების საქმეზე სასამართლოს მიმართავს მხოლოდ წინასასამართლო სხდომის განსაზღვრის თაობაზე შუამდგომლობით, რადგან ეს უკანასკნელი სასჯელს უკვე იხდის სხვა სისხლის სამართლის საქმეზე დამდგარი გამამტყუნებელი განაჩენის საფუძველზე“, - განაცხადა ამირან გულუაშვილმა.

პროკურატურის მიერ გავრცელებული ინფორმაცია ამ ეტაპზე წარმოადგენს გამოძიების ვერსიასა და ბრალდების მხარის პოზიციას. ირაკლი ღარიბაშვილის ახალი ბრალის საქმეზე საბოლოო გადაწყვეტილება სასამართლომ უნდა მიიღოს.