ზელენსკი თეთრ სახლში ტრამპს შეხვდება - პარალელურად, შესაძლოა, რუსეთისთვის ახალი სანქციები დამტკიცდეს

უკრაინის პრეზიდენტი ვოლოდიმირ ზელენსკი ვაშინგტონში ჩავიდა, სადაც აშშ-ის პრეზიდენტს, დონალდ ტრამპს შეხვდება.

როგორც ზელენსკი სოციალურ ქსელ X-ში წერს, ვიზიტის ფარგლებში შეხვედრები იგეგმება როგორც აშშ-ის პრეზიდენტთან და მის გუნდთან, ისე ყველა მხარესთან, ვისაც უკრაინის თავდაცვის მხარდაჭერა შეუძლია.

„ჩვენი განრიგი შეხვედრებს მოიცავს პრეზიდენტ ტრამპთან, მის გუნდთან და ყველასთან, ვისაც ჩვენი თავდაცვის მხარდაჭერა შეუძლია. ნომერ პირველი პრიორიტეტი ანტიბალისტიკური თავდაცვა და აშშ-თან სტრატეგიული თანამშრომლობაა“, - აღნიშნავს ზელენსკი.

თეთრ სახლში პრეზიდენტების შეხვედრა თბილისის დროით 17:30 საათზეა დაგეგმილი და ის დახურულ კარს მიღმა გაიმართება.

ამასთან, სააგენტო Reuters-ის ცნობით, ზელენსკი ვაშინგტონში გარდაცვლილი ამერიკელი სენატორის, ლინდსი გრემის დაკრძალვის ცერემონიას დაესწრება და სამშაბათს საღამოს აშშ-ის სენატის წევრებსაც შეხვდება.

უკრაინის პრეზიდენტის ვიზიტი, შესაძლოა, დაემთხვეს სენატში რუსეთის წინააღმდეგ ახალი, მკაცრი სანქციების პაკეტის წარდგენასა და კენჭისყრას. აღნიშნულ საკანონმდებლო ინიციატივას, რომელიც თვეების განმავლობაში შეჩერებული იყო, აქტიურად ლობირებდა თავად სენატორი გრემი.

კანონპროექტის დამტკიცების შემთხვევაში, მოსკოვზე ეკონომიკური ზეწოლა მნიშვნელოვნად გაიზარდება. დოკუმენტი 100%-იან ტარიფებს უწესებს იმ ხუთი უმსხვილესი ქვეყნის პროდუქციას, რომლებიც რუსულ ნავთობსა და გაზს ყიდულობენ, მათ შორის ჩინეთსა და ინდოეთს.

ბოლო მომენტში განხორციელებული ინიციატივით, დონალდ ტრამპმა იმავე კანონპროექტში ირანის წინააღმდეგ სანქციების დამატებაც მოითხოვა. გასულ კვირას ტრამპის მოკავშირესთან, ლორა ლუმერთან საუბრისას, ზელენსკიმ აღნიშნა, რომ ამ ინიციატივას „შესანიშნავ იდეად“ მიიჩნევს.