ზელენსკი ზამთრის დადგომამდე რუსეთთან სამშვიდობო მოლაპარაკებები აღდგენას ითხოვს
უკრაინის პრეზიდენტმა ვოლოდიმირ ზელენსკიმ ზამთრის დადგომამდე რუსეთთან სამშვიდობო მოლაპარაკებების დაწყება მოითხოვა. ტელეარხ CBS-თან საუბრისას ქვეყნის ლიდერმა თქვა, რომ ამჟამინდელი ვითარების გათვალისწინებით დიპლომატიური გზების მოძიება ყველა მხარისთვის აუცილებელია.
უკრაინის პრეზიდენტის აზრით, მოლაპარაკებების წარმატება უშუალოდ რუსეთის ლიდერ ვლადიმერ პუტინზე ზეწოლის გაზრდაზე იქნება დამოკიდებული. ვოლოდიმირ ზელენსკის განმარტებით, აუცილებელია სანქციების გამკაცრება, რადგან რუსულ საზოგადოებაში არსებულ უკმაყოფილებას დიპლომატიურ პროცესებზე პირდაპირი გავლენის მოხდენა შეუძლია. ომში მყოფი ქვეყნის ლიდერი არ გამორიცხავს, რომ მოლაპარაკებები, შესაძლოა, ევროპელი პარტნიორების დახმარებით ან პირდაპირ, ორმხრივ რეჟიმში გაიმართოს.
ანალიტიკოსები აღნიშნავენ, რომ ზელენსკის მხრიდან გააქტიურება ბრძოლის ველზე კიევის გაუმჯობესებულ სტრატეგიულ პოზიციას ეფუძნება. როგორც ცნობილია, ფრონტის ხაზზე რუსული ძალების წინსვლა შენელდა, უკრაინამ კი მოწინააღმდეგის ნავთობის ინდუსტრიაზე სარაკეტო დარტყმების არეალი გააფართოვა. უკრაინელი სამხედრო მეთაურის, ბრიგადის გენერალ ანდრიი ბილეცკის შეფასებით, რუსეთის არმია ამჟამად გამოფიტულია და მასშტაბური გარღვევების განხორციელება აღარ შეუძლია. ექსპერტები მიიჩნევენ, რომ სწორედ ამ მოცემულობით სარგებლობა სურს ზელენსკის, თუმცა, აღსანიშნი ფაქტია, რომ მის ინიციატივას ჯერ არც მოსკოვიდან და არც ვაშინგტონიდან არ ეხმიანებიან.
შეგახსენებთ, ამერიკის შეერთებული შტატების შუამავლობით დაწყებული სამშვიდობო მოლაპარაკებების პროცესი აშშ-ირანის ომის ფონზე რამდენიმე კვირის წინ სრულად გაჩერდა.
BM.GE
წყარო: bm.ge