ზელენსკიმ და რომის პაპმა ოკუპირებულ ოლეშკიში ცეცხლის შეწყვეტის საკითხი განიხილეს
უკრაინის პრეზიდენტმა, ვოლოდიმირ ზელენსკიმ და რომის პაპმა, ლეო XIV-მ სატელეფონო საუბრისას რუსეთის მიერ ოკუპირებულ ქალაქ ოლეშკიში შექმნილი ჰუმანიტარული კრიზისი და ცეცხლის შეწყვეტის შესაძლებლობა განიხილეს.
19 ოქტომბერს გამართული კომუნიკაციის დროს მხარეებმა ხერსონის ოლქის ამ დასახლებაში მყოფი მოსახლეობის დახმარების გზებსა და ვატიკანის დიპლომატიურ ძალისხმევაზე იმსჯელეს. ზელენსკის განმარტებით, კიევი მოქალაქეების დასახმარებლად შესაბამის გადაწყვეტილებებს ამზადებს, პონტიფიკოსმა კი მას რუსულ მხარესთან გამართული კონტაქტების შესახებ მიაწოდა ინფორმაცია. ცნობისთვის, ამ საუბრამდე სამი დღით ადრე, 16 ოქტომბერს რომის პაპი ვლადიმირ პუტინს დაუკავშირდა და ოლეშკიში ზავის გამოცხადება შესთავაზა.
კრემლის განცხადებით, რუსეთის პრეზიდენტმა ქალაქში არსებულ კრიზისზე პასუხისმგებლობა უკრაინას დააკისრა.
რაც შეეხება ადგილზე არსებულ ვითარებასა და ევაკუაციის პროცესს, უკრაინის ომბუდსმენმა, დმიტრო ლუბინეცმა 18 ოქტომბერს განაცხადა, რომ კიევი და მოსკოვი მოსახლეობის გამოსაყვანად შეთანხმების მიღწევასთან ახლოს არიან. მოლაპარაკებები ადგილობრივი მნიშვნელობის ცეცხლის შეწყვეტას ეხება. ეს პროცესი კი მიზნად მოქალაქეების უშუალოდ უკრაინის მიერ კონტროლირებად ტერიტორიაზე პირდაპირ გადაყვანას ისახავს. მართალია, მხარეებს საბოლოო შეთანხმება ოფიციალურად ჯერ არ გამოუცხადებიათ, თუმცა საკითხზე მუშაობა გრძელდება და უცნობია, თუ რა გავლენას იქონიებს პროცესზე პაპის ჩარევა.
ინფორმაციისთვის, ამჟამად ფრონტისპირა ქალაქში დაახლოებით 2,000 მცხოვრები საკვების, წყლის, მედიკამენტებისა და ელექტროენერგიის მწვავე დეფიციტის პირობებშია ბლოკირებული. ამას გარდა, დანაღმული გზები, დრონების მუდმივი იერიშები და რუსულ საგუშაგოებზე მიმდინარე დაკითხვები უსაფრთხო ევაკუაციას თითქმის შეუძლებელს ხდის, საოკუპაციო ძალები კი რეგიონში ჰუმანიტარულ ორგანიზაციებს არ უშვებენ.
BM.GE
წყარო: bm.ge