უკრაინამ რუსეთის ნავთობის გადამამუშავებელი ქარხანა, ათი ტანკერი და ოთხი ბორანი დაბომბა

უკრაინის შეიარაღებული ძალების გენერალური შტაბის განცხადებით, 11 ივლისსა და 12 ივლისის ღამეს უკრაინის თავდაცვის ძალებმა რუსეთის სამხედრო და სამხედრო-ეკონომიკურ ობიექტებზე იერიშები მიიტანეს. მათ შორის, დარტყმა განხორციელდა სამარის ოლქში მდებარე სიზრანის ნავთობგადამამუშავებელ ქარხანაზე.

გენშტაბის ინფორმაციით, საწარმოს ტერიტორიაზე აფეთქებები და ხანძარი დაფიქსირდა. უწყების ცნობით, ქარხნის საპროექტო სიმძლავრე წელიწადში დაახლოებით 8.5 მილიონი ტონა ნავთობის გადამუშავებაა და ის ბენზინს, დიზელისა და საავიაციო საწვავს, ასევე სხვა ნავთობპროდუქტებს აწარმოებს, რომლებიც, მათივე განცხადებით, რუსეთის არმიის საჭიროებებისთვისაც გამოიყენება.

ამავე ცნობით, უკრაინულმა ძალებმა აზოვის ზღვის აკვატორიაში 10 რუსულ ტანკერსა და 4 ბორანსაც დაარტყეს. გენშტაბის განცხადებით, ტანკერები რუსეთის ნავთობისა და ნავთობპროდუქტების საერთაშორისო სანქციების გვერდის ავლით გადასაზიდად გამოიყენება, ხოლო ბორნები რუსეთის სამხედრო ლოგისტიკას ემსახურება.

გენშტაბის ინფორმაციით, 11 ივლისს უკრაინულმა სამხედროებმა ასევე დააზიანეს რუსეთის საწვავ-საპოხი მასალებით დატვირთული სარკინიგზო ეშელონი ზაპოროჟიეს ოლქის ოკუპირებული ტოკმაკის რაიონში.

გარდა ამისა, უკრაინის გენერალურმა შტაბმა დაადასტურა, რომ 10 ივლისს ლენინგრადის ოლქში მდებარე „ნოვატეკ-უსტ-ლუგის“ ნავთობგადამამუშავებელ კომპლექსზე განხორციელებული დარტყმის შედეგად ნავთობის გადამამუშავებელი დანადგარი დაზიანდა.

რუსულ მხარეს აღნიშნულ ინფორმაციაზე კომენტარი ამ დროისთვის არ გაუკეთებია.