ირანის დარტყმები აშშ-ს სამხედრო ობიექტებზე
ირანის „ისლამური რევოლუციის გუშაგთა კორპუსმა“ (IRGC) რეგიონში განთავსებულ ამერიკულ სამხედრო ინფრასტრუქტურაზე მასირებული რაკეტებითა და დრონებით დარტყმები განახორციელა, რამაც ვაშინგტონის პარტნიორი ქვეყნების საჰაერო თავდაცვის სისტემების სწრაფი ამოქმედება გამოიწვია.
ბაჰრეინში საჰაერო განგაშის სირენები ჩაირთო. IRGC-ის განცხადებით, მათმა ავიაციამ დაარტყა „ისას“ (Isa) ავიაბაზას, სადაც ამერიკელი სამხედრო პერსონალი პერიოდული როტაციით იმყოფება.
კუვეიტის სამხედრო უწყებამ დაადასტურა, რომ საჰაერო თავდაცვის სისტემები აქტიურად ებრძოდნენ „მტრულ საჰაერო სამიზნეებს“. ამავდროულად, ირანული მხარე ირწმუნება, რომ მათ კუვეიტში მდებარე ამერიკულ სარაკეტო ბაზაზე გამშვები მოწყობილობები და საბრძოლო მასალის საწყობები გაანადგურეს.
იორდანიის შეიარაღებულმა ძალებმა საკუთარ საჰაერო სივრცეში ირანიდან ნასროლი 4 რაკეტა წარმატებით ჩამოაგდეს. თეირანის მტკიცებით, მათი სამიზნე „პრინც ჰასანის“ ავიაბაზაზე არსებული საწვავისა და იარაღის საწყობები წარმოადგენდა.
ამ დროისთვის აშშ-ის ცენტრალურ სარდლობას (CENTCOM) ოფიციალური კომენტარი ბაზებზე მიტანილი ზიანის შესახებ არ გაუკეთებია. ჰორმუზის სრუტის გარშემო დაწყებულმა სამხედრო დაპირისპირებამ მალევე აისახა გლობალურ ბაზარზე. შაბათ-კვირას მომხდარი თავდასხმების ტალღის ფონზე, კვირა დღეს როგორც Brent-ის, ისე ამერიკული ნედლი ნავთობის (WTI) ფასები მკვეთრად, 3%-ზე მეტით გაიზარდა. ანალიტიკოსების შეფასებით, ნავთობის გაძვირება პირდაპირ უკავშირდება იმ შიშებს, რომ კონფლიქტი კიდევ უფრო გაფართოვდება და მსოფლიოს ყველაზე კრიტიკულ საზღვაო ენერგოდერეფანს სრულ ბლოკადას შეუქმნის.