ევროკავშირი უკრაინასთან მოლაპარაკებების შემდეგ საფეხურზე გადავიდა

ორი ათწლეულის განმავლობაში პირველად, ერთსა და იმავე დღეს გაწევრიანების ოთხ კონფერენციას ვატარებთ. ჩვენი ოთხი მოწინავე კანდიდატი - უკრაინა, მოლდოვა, ალბანეთი და მონტენეგრო - მნიშვნელოვან ნაბიჯებს დგამს წინ. უკრაინასთან და მოლდოვასთან ვხსნით მე-6 კლასტერს, რომელიც ფარავს თავდაცვისა და უსაფრთხოების სფეროებს, სადაც მათი ევროკავშირში გაწევრიანების მიზეზი განსაკუთრებით ძლიერია. ალბანეთი დახურავს პირველ თავებს. მონტენეგრო, რომელმაც 33-დან 18 თავი უკვე დახურა, ოფიციალური მოლაპარაკებების დასკვნით ეტაპზე მყარად გადადის. დღევანდელი იმპულსი ახლა პრაქტიკულ შედეგებად უნდა იქცეს“, - წერს მარტა კოსი, ევროკომისარი გაფართოების საკითხებში, სოციალურ მედია X-ზე.

მე-6 კლასტერი მოიცავს ორ სხვადასხვა თავს. 30-ე თავი ფარავს ევროკავშირის საერთო სავაჭრო პოლიტიკას, ჰუმანიტარულ დახმარებასა და განვითარების სფეროში თანამშრომლობას. 31-ე თავი საგარეო, უსაფრთხოებისა და თავდაცვის პოლიტიკაზე საუბრობს და ევროკავშირის საერთო საგარეო, უსაფრთხოებისა და თავდაცვის პოლიტიკას ეხება. მათ შორის, კანდიდატი ქვეყნების ევროკავშირის საგარეო პოლიტიკურ პოზიციებთან დაახლოებას.

„პირველი კლასტერის გახსნიდან სულ რაღაც ერთი თვისა და ირლანდიის თავმჯდომარეობის დაწყებიდან ორი კვირის თავზე, ჩვენ მივაღწიეთ კიდევ ერთ მნიშვნელოვან ეტაპს უკრაინის ევროკავშირში გაწევრიანების გზაზე - გავხსენით კიდევ ერთი საკვანძო მოლაპარაკებების კლასტერი საგარეო ურთიერთობების შესახებ. ეს ადასტურებს ქვეყნის მზადყოფნას, რაც შეიძლება სწრაფად წავიდეს წინ. დღევანდელ რთულ დროში, გაფართოება არის სტრატეგიული ინვესტიციამშვიდობასა და უსაფრთხოებაში, სტაბილურობასა და კეთილდღეობაში როგორც ევროკავშირის, ისე უკრაინისთვის.“ - აცხადებს ტომას ბირნი, ირლანდიის მინისტრი ევროპასთან ურთიერთობის საკითხებში.