სუს-ის ყოფილი უფროსის ადვოკატი ბრალდების მხარეს ინფორმაციის დამახინჯებაში ადანაშაულებს

თბილისის საქალაქო სასამართლოში სახელმწიფო უსაფრთხოების სამსახურის ყოფილი უფროსის, გრიგოლ ლილუაშვილის საქმეზე დაცვის მხარის მოწმეების — სუს-ის დაცვის თანამშრომლების დაკითხვა მიმდინარეობს.

ლილუაშვილის ადვოკატის, ლანა ცერცვაძის განცხადებით, მოწმეები დაადასტურებენ, რომ სუს-ში შემსვლელი ყველა პირი მკაცრად მოწმდებოდა და ეკონომიკის მინისტრის ყოფილი მოადგილე, მსჯავრდებული რომეო მიქაუტაძე ლილუაშვილის კაბინეტში არ უნახავთ.

ცერცვაძის თქმით, დაცვის წევრები ობიექტურ ჭეშმარიტებას იტყვიან და უარყოფენ ბრალდების მხარის ვერსიას:

„არაერთ პირს დავკითხავთ გრიგოლ ლილუაშვილის დაცვის შემადგენლობიდან, მათგან გვაქვს მოლოდინი, რომ სიმართლეს იტყვიან იმასთან დაკავშირებით, რომ რომეო მიქაუტაძე ე.წ. 14-კგ-იანი ხელბარგით გრიგოლ ლილუაშვილთან არ ყოფილა... წარმოუდგენელია, ქვეყნის უსაფრთხოებიდან გამომდინარე, მასთან ვიზიტორი არ გაკონტროლებულიყო.“

ადვოკატმა ასევე ისაუბრა ლილუაშვილის ყოფილ მოადგილეზე, ლევან ახობაძეზე, რომლის წინასასამართლო სხდომაც დღეს იმართება. ცერცვაძემ იმედი გამოთქვა, რომ ახობაძე „ღირსებას შეინარჩუნებს“ და მიქაუტაძისგან განსხვავებით ცრუ ჩვენებას არ მისცემს. შეგახსენებთ, გრიგოლ ლილუაშვილს განსაკუთრებით დიდი ოდენობით ქრთამის აღება ბრალდება, რაც 11-დან 15 წლამდე პატიმრობას ითვალისწინებს.