ტრამპის ხელმოწერით რუსეთის სანქცირებაზე ლინდსი გრემის კანონპროექტი ძალაში შევიდა
თეთრი სახლის ინფორმაციით, აშშ-ს პრეზიდენტმა დონალდ ტრამპმა ხელი მოაწერა რუსეთის წინააღმდეგ დამატებითი სანქციების დაწესების მიზნით შემუშავებულ კანონპროექტს, რომლის ინიციატორი რესპუბლიკელი სენატორი ლინდსი გრემი იყო.
თეთრი სახლის ცნობით, კანონპროექტს კონგრესმა მხარი 16 სექტემბერს დაუჭირა, რის შემდეგაც ის ხელმოსაწერად აშშ-ს პრეზიდენტ ტრამპს გადაეგზავნა.
კანონპროექტი რუსეთის წინააღმდეგ სანქციების გაფართოებას ისახავს მიზნად და იმ ქვეყნებზე დამატებითი ეკონომიკური ზეწოლის შესაძლებლობას ითვალისწინებს, რომლებიც რუსეთისგან დიდი რაოდენობით ენერგორესურსებს ყიდულობენ. დოკუმენტი ასევე ითვალისწინებს დამატებით სანქციებს რუსეთის ფინანსური სექტორის, ენერგეტიკული პროექტებისა და თავდაცვის ინდუსტრიის წინააღმდეგ.
კანონპროექტით გათვალისწინებული ზომები ასევე შეიძლება შეეხოს იმ ქვეყნებსა და კომპანიებს, რომლებიც რუსეთს სანქციების გვერდის ავლაში ეხმარებიან.
კანონპროექტი გარკვეულ გამონაკლისებს ითვალისწინებს იმ ქვეყნებისთვის, რომლებიც რუსული ენერგორესურსების შედარებით მცირე რაოდენობას ყიდულობენ და რუსულ ენერგორესურსებზე დამოკიდებულების შემცირების მიმართულებით ნაბიჯებს დგამენ.
დოკუმენტი აშშ-ს პრეზიდენტს აძლევს უფლებამოსილებას, დამატებითი ტარიფები დაუწესოს იმ ქვეყნებს, რომლებიც რუსული ენერგორესურსების უმსხვილეს მყიდველებს შორის არიან. ამ ქვეყნებს შორის შეიძლება იყვნენ ჩინეთი და ინდოეთი.
ფორმულა
წყარო: formulanews.ge