რუსეთში სახელმწიფო დუმის არჩევნები დასრულდა და წიანსწარი შედეგებით „ერთიანი რუსეთი“ ლიდერობს

რუსეთში სამი დღის განმავლობაში (18-დან 20 სექტემბრამდე) მიმდინარე საპარლამენტო — სახელმწიფო დუმის არჩევნები დასრულდა. რუსეთის ცენტრალური საარჩევნო კომისიის (ცესკო) მონაცემებით, არჩევნებზე წინასწარმა აქტივობამ 56,66% შეადგინა.

ცესკოს თავმჯდომარე ელა პამფილოვას თანახმად, ბიულეტენების 13,9%-ის დამუშავების შემდეგ მიღებული პირველი მონაცემებით, ლიდერობს „ერთიანი რუსეთი“ 57,54%-ით, რასაც მოსდევს რუსეთის ფედერაციის კომუნისტური პარტია 13,67%-ით, რუსეთის ლიბერალ-დემოკრატიული პარტია 9,2%-ით, „ახალი ხალხი“ 7,96%-ით და „სამართლიანი რუსეთი“ 5,16%-ით. დანარჩენმა ხუთმა პარტიამ ხმების 5%-იანი ბარიერი ვერ გადალახა და ახალი მოწვევის სახელმწიფო დუმაში წარმოდგენილი არ იქნება.

აღსანიშნავია, რომ ეს მონაცემები ოდნავ განსხვავდება სრულიად რუსეთის ცენტრის ეგზიტპოლების შედეგებისგან. რაც შეეხება უცხოეთში არსებულ საარჩევნო უბნებს, დამოუკიდებელი საინიციატივო ჯგუფების („პროგრესი“ და „გაზაფხული“) ეგზიტპოლებით, საზღვარგარეთ მცხოვრები რუსების ყველაზე მეტი ხმა პარტია „ახალმა ხალხმა“ მოაგროვა (მაგალითად: ნიდერლანდში — 57%, სერბეთში — 63%, პოლონეთში — 50%, ჩეხეთში — 49%, საფრანგეთში — 39%, გერმანიაში — 37%).

არჩევნებს თან სდევდა ცნობები შეფერხებებისა და დარღვევების შესახებ. მოსკოვში რამდენიმე უბანზე ქაღალდის ბიულეტენების გაცემა შეწყვიტეს და ამომრჩევლებს ელექტრონულად ხმის მიცემას სთავაზობდნენ, მრავალი რეგიონიდან კი დამკვირვებლების არდაშვებისა და დაკავების ფაქტები ფიქსირდებოდა.