არჩილ გორდულაძემ ევროკავშირს ჩიხიდან გამოსავლის პოვნისკენ მოუწოდა

„ქართული ოცნების“ დეპუტატმა, არჩილ გორდულაძემ ჟურნალისტის იმ კითხვას უპასუხა, რომელიც შალვა პაპუაშვილის ბრიუსელში გაკეთებულ განცხადებას უკავშირდებოდა, სადაც პარლამენტის თავმჯდომარემ აღნიშნა, რომ „მნიშვნელოვანია ბრიუსელი დიალოგის გზას დაუბრუნდეს“. როგორც გორდულაძემ განაცხადა, ევროკავშირის ინტერესებიდან და პრაგმატული მიდგომიდან გამომდინარე, მათ თავად უნდა მოძებნონ გამოსავალი ჩიხში შესული ურთიერთობებიდან და გადახედონ საკუთარ გადაწყვეტილებებს:

„ევროკავშირის ინტერესებიდან და პრაგმატული მიდგომიდან გამომდინარე, ჩიხში შესული ურთიერთობებიდან გამოსავალი თვითონვე მოძებნონ და თავიანთ გადაწყვეტილებებს გადახედონ! — როგორც საქართველოს სჭირდება ევროკავშირი, არანაკლებად სჭირდება ევროკავშირს საქართველო“.

მისი თქმით, ჩვენი ქვეყანა რეგიონში დიდ როლს ასრულებს და ევროკავშირის წარმომადგენლობა ამ ყველაფერზე უნდა დაფიქრდეს. დეპუტატმა ხაზგასმით აღნიშნა, რომ ევროკავშირის მიმართ მათი გუნდის განცხადებები ყოველთვის საპასუხო ხასიათს ატარებს და ასეთი განცხადებების ინიციატორები თავად არასდროს არიან, თუმცა თავდასხმასა და ტყუილების გავრცელებას აუცილებლად პასუხობენ, რადგან ასეთია ქართველი ხალხის დავალება:

„ჩვენ შემდგარი ქვეყანა ვართ — ყველამ კეთილი ინებოს და პატივი სცეს მის უდიდებულესობას ქართველ ხალხს და მის გადაწყვეტილებას“.