ზელენსკი: მსოფლიომ უფრო მკაცრი პასუხი უნდა აირჩიოს რუსეთისთვის
უკრაინის პრეზიდენტი, ვოლოდიმირ ზელენსკი, გასულ ღამეს რუსეთის მხრიდან იერიშს გამოეხმაურა. ზელენსკის ინფორმაციით, რუსეთის თავდასხმების შედეგად 14 ადამიანი დაშავდა, 2 კი დაიღუპა.
"კიევსა და ზაპოროჟიეში, ასევე ოდესის, სუმისა და ხარკოვის რეგიონებში საცხოვრებელ სახლებზე არაერთი დარტყმა განხორციელდა. სამწუხაროდ, ზაპოროჟიეში ორი ადამიანი დაიღუპა. ვუსამძიმრებ მათ ოჯახებსა და ახლობლებს.
დაზიანდა სამოქალაქო ინფრასტრუქტურაც: საბავშვო ბაღი და ლიცეუმი კიევის რეგიონში, უნივერსიტეტი ხარკოვში, ასევე ენერგეტიკული ინფრასტრუქტურა პოლტავის, მიკოლაივისა და ვინიცის რეგიონებში", - თქვა ზელენსკიმ.
უკრაინის პრეზიდენტმა პარტნიორებს მოუწოდა არ დაივიწყონ, რომ რუსეთი ყოველდღიურად აძლიერებს ესკალაციას. ზელენსკის თქმით, თხოვა პრეზიდენტ ტრამპს გამოიყენოს ლინდსი გრემის კანონი რუსეთისა და ყველა მისი მოკავშირის წინააღმდეგ, ვინც ხელს უწყობს ომის აგრესიას. მან ასევე მოუწოდა ევროკავშირს, დააწესონ დამატებითი სანქციები, რათა საბოლოოდ დამყარდეს მშვიდობა.
"თუ რუსებმა გადაწყვიტეს, რომ მათი დარტყმები კიდევ უფრო სასტიკი გახადონ, მსოფლიომ უფრო მკაცრი პასუხი უნდა აირჩიოს, რათა ომი კიდევ უფრო არ გავრცელდეს.
ჩვენ ვთხოვთ პრეზიდენტ ტრამპს, რუსეთისა და ყველას წინააღმდეგ, ვინც ფინანსურად ამაგრებს მის ომს, გამოიყენოს ლინდსი გრემის კანონი.
ჩვენ ვთხოვთ ანტონიო კოსტასა და ურსულა ფონ დერ ლაიენს, დააწესონ დამატებითი ევროპული სანქციები.
ჩვენ ვთხოვთ ყველა ლიდერს, არ ამოიღონ რუსი ოლიგარქები მოქმედი სანქციების სიებიდან და გააგრძელონ ტერორისტებთან ნებისმიერი ვაჭრობის შეზღუდვა, ვიდრე რუსეთი ომს არ შეწყვეტს.
სწორედ ასე - ყოველდღიური ერთობლივი ძალისხმევით - უნდა დავაახლოვოთ მშვიდობა", - აღნიშნა ზელენსკიმ.
ფორმულა
წყარო: formulanews.ge