ევროკომისიამ უკრაინას 2.9 მილიარდი ევრო გამოუყო

ევროკომისიის ინფორმაციით, უკრაინას 2.9 მილიარდი ევრო გამოუყვეს ფინანსური საჭიროებების დასაფარად და ქვეყნის საჯარო ადმინისტრაციის ფუნქციონირების შესანარჩუნებლად, იმ პირობებში, როდესაც უკრაინა აგრძელებს თავის დაცვას რუსეთის აგრესიული ომის წინააღმდეგ.

ევროკომისიის ცნობით, აღნიშნული თანხიდან €800 მილიონი პირველად გამოიყოფა უკრაინის მხარდაჭერის სესხის (Ukraine Support Loan) უკრაინის ფონდის (Ukraine Facility) კომპონენტის ფარგლებში.

"იმ დროს, როდესაც უკრაინა რუსეთის აგრესიის წინააღმდეგ თავს იცავს, ის ასევე აგრძელებს უკრაინის გეგმით გათვალისწინებული ყოვლისმომცველი რეფორმების განხორციელებას.

დღევანდელი ტრანშით ჩვენ ვეხმარებით უკრაინას ფინანსური სტაბილურობის შენარჩუნებაში და მხარს ვუჭერთ ინვესტიციებს, რომლებიც საფუძველს ჩაუყრის ქვეყნის მომავალ აღდგენას. რადგან ევროპული სოლიდარობა კონკრეტულ მხარდაჭერას ნიშნავს.

ევროპა უკრაინის გვერდით იქნება იმდენ ხანს, რამდენიც საჭირო იქნება", - თქვა ევროკომისიის პრეზიდენტმა ურსულა ფონ დერ ლაიენმა.

ევროკომისიის განმარტებით, ეს არის უკრაინის ფონდის ფარგლებში განხორციელებული მერვე გადარიცხვა. ფონდი ევროკავშირის მთავარი ინსტრუმენტია უკრაინის აღდგენის, რეფორმების დღის წესრიგისა და ევროკავშირში გაწევრიანების მიმართულებით პროგრესის მხარდასაჭერად.

ინფორმაციის თანახმად, მიმდინარე დარჩენილი პერიოდისთვის უკრაინისთვის ხელმისაწვდომია კიდევ 33.7 მილიარდი ევროს ოდენობის ფინანსური მხარდაჭერა