EU-მ უკრაინის ოკუპირებულ ტერიტორიებზე რუსეთის დუმის არჩევნებში მონაწილე 77 პირს სანქციები დაუწესა

ევროკავშირის საბჭომ უკრაინის დროებით ოკუპირებულ ტერიტორიებზე 2026 წლის სექტემბერში ჩატარებულ რუსეთის სახელმწიფო დუმის ე.წ. არჩევნებში მონაწილე 77 პირის წინააღმდეგ სანქციები დააწესა.

სანქცირებულთა შორის 74 კანდიდატია, რომლებიც ე.წ. დონეცკისა და ლუგანსკის სახალხო რესპუბლიკებში, ზაპოროჟიესა და ხერსონის ოლქებში, ასევე ყირიმის ე.წ. რესპუბლიკასა და ქალაქ სევასტოპოლში სხვადასხვა პარტიის სახელით იყრიდნენ კენჭს.

ევროკავშირის საბჭოს განცხადებით, ამ პირებმა რუსეთის სახელმწიფო დუმის ე.წ. არჩევნებში მონაწილეობით ხელი შეუწყვეს რუსეთის აგრესიული ომის ლეგიტიმაციის მცდელობასა და უკრაინის ტერიტორიების უკანონო ოკუპაციის შენარჩუნებას.

სანქციები დაუწესდა რუსეთის ცენტრალური საარჩევნო კომისიის სამ წევრსაც, რომლებსაც საბჭო ე.წ. არჩევნების ორგანიზებაში ადანაშაულებს.

სანქციები ითვალისწინებს ევროკავშირის ტერიტორიაზე შესვლისა და ტრანზიტით გადაადგილების აკრძალვასა და აქტივების გაყინვას. ამასთან, ევროკავშირის მოქალაქეებსა და კომპანიებს ეკრძალებათ სანქცირებული პირებისთვის თანხების, ფინანსური აქტივებისა და ეკონომიკური რესურსების ხელმისაწვდომობა.

ევროკავშირმა უკრაინის დროებით ოკუპირებულ ტერიტორიებზე ე.წ. არჩევნების ჩატარება დაგმო და აღნიშნა, რომ ეს საერთაშორისო სამართლის, მათ შორის გაეროს წესდების, ასევე უკრაინის დამოუკიდებლობის, სუვერენიტეტისა და ტერიტორიული მთლიანობის დარღვევაა.

ევროკავშირმა ხაზგასმით აღნიშნა, რომ არ აღიარებს და არასდროს აღიარებს უკრაინის ოკუპირებულ ტერიტორიებზე ამ ე.წ. არჩევნების ჩატარებას ან მის შედეგებს.