ევროკავშირი არქტიკის სტრატეგიის შეცვლას გეგმავს რუსეთის სამხედრო აქტიურობის ზრდის ფონზე

ევროკავშირმა არქტიკის რეგიონთან მიმართებით საკუთარი სტრატეგიული მიდგომას უნდა გადახედოს, რადგან რუსეთი რეგიონში სამხედრო ძალების აღდგენასა და გაძლიერებას განაგრძობს. ამასთან, უსაფრთხოების ის პრინციპები, რომლებიც აქამდე არქტიკაში სტაბილურობას უზრუნველყოფდა, მომავალში შესაძლოა ვეღარ იყოს საიმედო. ამის შესახებ სამშაბათს ევროკომისიის პრეზიდენტმა ურზულა ფონ დერ ლაიენმა განაცხადა.

„არქტიკა ის რეგიონია, სადაც გეოპოლიტიკური ინტერესები ერთმანეთს მკვეთრად უპირისპირდება. ეს არ არის შორეული ტერიტორია, რომელიც ევროკავშირს არ ეხება — არქტიკა თავად ევროკავშირის ნაწილია“, — აღნიშნა ფონ დერ ლაიენმა არქტიკის საკითხებზე ევროკავშირის ახალი სტრატეგიის წარდგენისას.

ახალი დოკუმენტის მიხედვით, ევროკავშირი კვლავ მხარს უჭერს მიდგომას, რომლის თანახმადაც არქტიკის ტერიტორიაზე ნავთობის, ქვანახშირისა და ბუნებრივი აირის მარაგები მიწისქვეშ უნდა დარჩეს.

ევროკომისიისა და ევროკავშირის საგარეო პოლიტიკის ხელმძღვანელის, კაია კალასის მიერ სამშაბათს წარმოდგენილ სტრატეგიაში ნათქვამია, რომ კავშირი ამ პრინციპის ერთგული რჩება, მათ შორის არქტიკულ რეგიონებშიც.

დოკუმენტში ასევე აღნიშნულია, რომ კომისია პარტნიორებთან თანამშრომლობით იმუშავებს არქტიკის ბუნებრივი გარემოს დასაცავად და შეეცდება ხელი შეუშალოს ისეთი ნახშირწყალბადების მარაგების მოპოვებას, რომელთა ათვისებამ შესაძლოა საფრთხე შეუქმნას რეგიონის ეკოსისტემას.

მიუხედავად ამისა, ახალ სტრატეგიაში აღარ გვხვდება 2021 წლის დოკუმენტში არსებული ჩანაწერი, რომელიც ითვალისწინებდა საერთაშორისო სამართლებრივი ვალდებულების შექმნაზე მუშაობას. აღნიშნული ინიციატივის მიზანი იყო არქტიკასა და მის მიმდებარე ტერიტორიებზე ნახშირწყალბადების ახალი მარაგების მოპოვების აკრძალვა, ასევე ამ საქმიანობის შედეგად მიღებული პროდუქციის შეძენის შეზღუდვა.